VOV4.Êđê- Ti Hà Nội, êpul hgŭm phŭng mniê bruă duh mkra mnia mblei Việt Nam bi mguôp leh hŏng anôk bruă mơ̆ng Êpul hgŭm lu ala kơ klei mtăp mđơr leh anăn jao klei dưi phung mniê (UN Women) mkŏ mjing klei bi kƀĭn phung mniê bruă mnia mblei Việt Nam thŭn 2021 hŏng êbeh 40 anôk bi kƀin ƀri wưng bi hdơr hruê phung mnia mblei Việt Nam 13/10, hruê phung mniê Việt Nam 20/10 leh anăn 20 thŭn hruê mkŏ mjing êpul hgŭm phung mniê bruă mnia mblei. Klei kƀĭn anei hŏng akŏ “Mlih mrô: Mơ̆ng klei mĭn truh kơ bruă ngă, mđĭ mtrŭt mđi klei thâo bruă duh mkra mơ̆ng phung mniê hlăm bruă đru kơ knơ̆ng bruă mâo phung mniê ngă phŭn, krŭ wĭt bruă duh mkra mnia mblei, bi djŏ guôp hlăm wưng bruă tuh tia 4.0 leh anăn klei hmăi kyua klei ruă tưp Covid-19 dôk hlăm tar rŏng lăn leh anăn Việt Nam. Hlăm klei kƀĭn anăn, phung bi ala bi trông, bi klă dŭm boh klei kơ bruă mlih mrô hŏng knơ̆ng bruă, hlăm anăn mâo knơ̆ng bruă mâo mniê ngă phŭn. Dŭm kdrăp yua, bruă ngă, tur knơ̆ng mrô srăng dưi dưn yua hŏng dŭm knơ̆ng bruă điêt leh anăn man dưn, hdră mkŏ mjing dŭm bruă ngă êjai ngă klei mlih mrô ti knơ̆ng bruă.”

Pô mblang: Y-Ƀel Êban