VOV4.Êđê - Tlam hruê 10/9 mbruê, Khua hlăm Phŭn bruă kđi čar, K’iăng khua knŭk kna Phạm Bình Minh mbĭt hŏng Khua hlăm Anôk bruă kƀĭn ala, Khua phŭn bruă hŏng tač êngao Trung Quốc Vương Nghị gĭt gai leh Klei bi kƀĭn tal 13 Dhar bruă gĭt gai hdră bi hgŭm dua nah Việt Nam - Trung Quốc.

 Ti anôk bi kƀĭn, dua tĭng tŭ ư mtrŭt mđĭ hdră mkŏ mjing dŭm gưl hiu čhưn, bi tuôm gưl dlông, pŏk ngă tŭ dưn hdră bi hgŭm plah wah dua Đảng, mđĭ lar bruă klam yuôm bhăn mơ̆ng dua Phŭn bruă hŏng tač êngao hlăm bruă kiă kriê, mtrŭt mđĭ klei bi mjĕ plah wah dua ala čar, pŏk ngă kjăp klei bhiăn bi hgŭm hlăm bruă lĭng kahan, răng mgang klei êđăp ênang, hluê ngă hdră bhiăn, bi trông klei thâo lehanăn bi hgŭm hlăm hdră mdrơ̆ng hŏng klei ruă Covid 19, hlăm anăn mâo hdră bi hgŭm hlăm bruă vaccine. Vương Nghị hưn, Trung Quốc srăng đru thiăm 3 êklăk hnơ̆ng vaccine kơ Việt Nam hlăm thŭn anei, mđĭ ênoh vaccine đru mơ̆ng Trung Quốc truh 5,7 ệklăk. Kơ boh klei hlăm krĭng Êa ksĭ, dua tĭng tŭ ư hluê ngă kjăp klei thâo săng mbĭt, ksiêm dlăng klei amâo thâo bi djŏ, amâo mâo bruă ngă mđĭ klei rŭng, krơ̆ng kjăp klei h’ĭt ênang ti krĭng Êa ksĭ Ngŏ./.

H Nêč pô mblang