VOV4.Êđê - Aguah 8/10, Sang hră Gưl prŏng bruă duh mkra - Sang hră gưl prŏng ala čar Hà Nội bi hgŭm hŏng Sang hră gưl prŏng hải Phìng, Sang hră gưl prŏng bruă mnia blei leh anăn Anôk bruă kriê dlăng wăl duh mkra Hải Phòng mkŏ mjing klei kƀĭn trông Kreh knhâo hŏng akŏ “FDI kluôm rŏng lăn leh anăn bruă ngă mơ̆ng anôk bruă duh mkra FDI ti Việt Nam hlăm boh klei mrâo”. Hluê si klei hâo hưn ti anôk bi kƀĭn, prăk FDI kluôm rŏng lăn leh anăn FDI hlăm Việt Nam ngă leh, leh anăn hlăk hmaĭ ktang mơ̆ng klei ruă Covid-19. Khădah, prăk duh bi liê mơ̆ng ala tač êngao hlăm ala čar drei hlăm 9 mlan thŭn anei ăt mâo êbeh 22 êklai USD, đĭ 4,4% mkă hŏng wưng anei thŭn dih. Anei jing sa klei tŭ năng mơak, bi êdah klei đaŏ knang mơ̆ng phung duh bi liê, ruah Việt Nam jing anôk čiăng mkra mjing, mnia blei. Khădah snăn, phung bi ala ăt hlăk mblang dŭm klei êdu kƀah hlăm bruă iêu jak FDI ala čar drei hlăm wưng êgao msĕ si: Boh klei čhŏ djhan wăl hdĭp mda, amâo djăp klei găl, prăk kăk mơ̆ng dŭm hdră bruă FDI. Kơ hdră msir iêu jak FDI ênuk mrâo hlăm wưng kơ anăp, phung bi ala lač, brei ala čar drei mâo dŭm hdră êlan đru jih hnơ̆ng, mâo klei bu ktưn, čiăng iêu jak phung duh bi liê prŏng.

H Zawut pô mblang