VOV4.Êđê- Aguah mbruê, ti Hà Nội, mkŏ mjing leh hdră bi tuôm hŏng êlan online plah wah êpul hđeh êdam êra Việt Nam - Trung Quốc thŭn 2021. Nao hgŭm hlăm hdră anăn, mâo pô bi ala khua gĭt gai bruă êpul hđeh êdam êra gưl dlông Hồ Chí Minh, bruă êpul hđeh êdam êra gưl dlông Trung Quốc leh anăn êbeh 90 čô bi ala hđeh êda êra, hđeh sang hră gưl prŏng, phung ngă bruă hŏng tač êngao mda asei êdah kdlưn mơ̆ng 2 ala čar. Hdră anei kñăm mđĭ hĭn klei bi tuôm, blŭ hrăm, thâo săng hdơ̆ng pô, đru mtô mjuăt hđeh êdam êra 2 ala čar kơ klei jing ƀĭng hgŭm knhuah gru 2 ala čar Việt Nam - Trung Quốc, bi klă klei mĭn, bruă klam leh anăn bi lar bruă ksŭng nao êlâo mơ̆ng phung mda asei, bi siam klei bi mguôp plah wah 2 ala čar. Hlăm hdră anăn, phung bi ala hđeh êdam êra êdah kdlưn Việt Nam - Trung Quốc bi kah mbha leh klei thâo hlăm bruă Đoàn leh anăn bruă hđeh êdam êra hlăm bruă nao hgŭm gang mkhư̆ klei ruă tưp Covid-19 grăp ala čar, klei thâo kơ phung hđeh êdam êra hlăm wưng ñŭ kma hŏng tar rŏng lăn ară anei.

Pô mblang: Y-Ƀel Êban