VOV4.Êđê - Klei êmuh leh anăn wĭt lač klei êmuh hlăm klei kƀĭn tal 2, bruă kƀĭn ala gưl 15 dưi mkŏ mjing hlăm 2 hruê mkrah, kčưm mơ̆ng aguah anei. Khua phŭn bruă mdrao mgŭn Nguyễn Thanh Long, khua phŭn bruă mnuih mă bruă kahan êka êkeh leh anăn yang ƀuôn Đào Ngọc Dung, khua phŭn bruă mtô mjuăt bi hriăm Nguyễn Kim Sơn, khua phŭn bruă hdră êlan leh anăn duh bi liê Nguyễn Chí Dũng srăng nao kơ anăp leh anăn wĭt lač klei êmuh. Mĭn tĭng aguah knăm 5 hruê 12/11, Khua knŭk kna Phạm Minh Chính srăng bi klă dŭm boh klei djŏ tuôm leh anăn wĭt lač klei êmuh mơ̆ng phung bi ala bruă kƀĭn ala. Êlâo kơ klei êmuh anăn, lu phung bi ala bruă kƀĭn ala leh anăn phung bi ala hmăng hmưi, dŭm klei êmuh anei srăng dưi ba mdah lu hdră êlan hdĭp êđăp ênang, mbruă hŏng klei ruă tưp Covid-19, krŭ wĭt, mđĭ kyar bruă duh mkra ala ƀuôn. Êpul boh klei kơ bruă gang mkhư̆ klei ruă tưp Covid-19 hruê mmông êgao leh anăn hdră êlan gang mkhư̆, hdră tlŏ mgang vaccine hlăm hruê mmông kơ anăp mâo klei uêñ mĭn mơ̆ng phung bi ala.

Y Ƀel pô mblang