VOV4.Êđê- Tuôm jing anôk mâo klei ruă tưp lu hĭn ti čar Dak Lak, hŏng 51 čô jing F0, ară anei ti ƀuôn Ea Bhôk, să Ea Bhôk, kdriêk Čư̆ Kuiñ êgao leh 25 hruê amâo lŏ mâo ôh mnuih ruă mrâo. Jing jang phung F1 bi ruê̆ leh hruê mmông ngă klei bi ktlah lehanăn mâo 44 čô mnuih ruă dưi mdrao hlao leh. Klei hdĭp mnuih ƀuôn sang ti nei dơ̆ng wĭt leh msĕ hŏng dŭm bruă si yăng đar.

 Leh ba čăp hla ktơr kơ êmô ƀơ̆ng, Y Doen Mlô, ti ƀuôn Bhok, să Ea Bhok, kdriêk Čư̆ Kuin, čar Dak Lak lŏ mprăp nao dlăng kdrăn lŏ. Dŭm bruă anei lŏ wĭt msĕ aguah tlam hŏng Y Doen Mlô sa hruê kăm anei. Êlâo anăn, hlăm knhal jih mlan 7, gŏ sang ñu jih 9 čô djŏ klei ruă Covid-19 sơaĭ; mâo 2 ung mô̆ Y Doen Mlô hŏng 3 čô anak leh anăn 4 čô čô. Truh ară anei knŏng ung mô̆ ñu dôk mdrao mgŭn, 8 čô adôk hlăm gŏ sang dưi mdrao hlao leh anăn bi leh klei bi ktlah 14 hruê ti sang leh wĭt mơ̆ng sang êa drao.

“Wĭt truh kơ sang kâo mơak snăk, klei suaih pral pô lŏ msĕ aguah tlam. Lŏ hma, ŭn êmô ăt mâo mnuih đru kriê dlăng brei, kâo wĭt kơ sang ƀuh jăk, lŏ ăt mrâo ƀlĕ kâo ăt mni lač jăk lu."

H’Noen Ksơr hŏng anak čô nao ƀhu mdiê

Ăt msĕ si Y Doen Mlô, H’Noen Ksơr leh jing hĕ mnuih ruă Covid-19 hlăm hruê 22/7 leh bi tuôm hŏng găp djuê jing F0. 5 čô mkăn hlăm gŏ sang ñu jing F1 leh anăn bi ktlah hjăn 21 hruê. Lŏ wĭt hŏng klei hdĭp aguah tlam leh 1 mlan mkrah mdrao mgŭn leh anăn bi ktlah hjăn kyua Covid-19, H’Noen Ksơr thâo săng hĭn kơ ênoh yuôm klei hdĭp leh anăn thâo săng hĭn hlăm bruă gang mkhư̆ klei ruă tưp:

“Aê mdrao mtă sĭt wĭt kơ sang, amâo dưi nao hiu ôh, knŏng dôk hlăm sang, kăn dưi bi tuôm hŏng pô mkăn rei, wăt anak čô hlăm sang, bi ktlah hjăn, êsei djam anak čô tŭk knă leh anăn ba kơ kâo, dŭm hruê leh wĭt kơ sang aê mdrao ăt ksiêm mkă. Ară anei kâo suaih leh, arăng brei kâo nao ti să ngă hră mơar dưi êrô hiu, nao pưk hma. Ară anei kâo jhŏng kbiă ti êngao ngă hră mơar, bi dŭm hruê êlâo kâo dôk hlăm sang đuič. Ară anei kâo ƀuh suaih leh lu. Mni lač jăk kơ phung aê mdrao mdrao leh kơ kâo.”

Y Doen Mlô lŏ wĭr ngă bruă aguah tlam leh mdrao hlao klei ruă Covid-19

 Đào Huy Cường, Khua ƀuôn Ea Bhok brei thâo, hruê 19-7, leh hlăm ƀuôn ƀuh mnuih ruă tal êlâo jing mnuih ƀuôn sang hlăm ƀuôn wĭt mơ̆ng čar Bình Dương, knŏng leh 3 hruê ênoh mnuih ruă đĭ truh 36 čô mnuih, leh anăn leh 10 hruê, kluôm ƀuôn mâo 51 čô mnuih ruă. 70 gŏ êsei mnuih ƀuôn sang hmaĭ kyua hlăm gŏ sang mâo F0 leh anăn F1. Čiăng pral msưh kdŭn klei ruă Covid-19, lu hdră msir mâo bruă sang čư̆ êa alŭ wăl pŏk ngă msĕ si: kwang dar kluôm ƀuôn Ea Bhok, ba yua Asăp mtrŭn mrô 16 kluôm să. Mbĭt hŏng anăn, klei hdĭp mda mnuih ƀuôn sang ăt dưi hmao đru, rơ̆ng amâo lui hlei gŏ êsei kƀah mnơ̆ng ƀơ̆ng huă hlăm wưng ƀuôn ngă klei kwang dar mkhư̆ klei ruă tưp.

Klei hdĭp lŏ wĭt msĕ aguah tlam ti ƀuôn Ea Bhok

 Hluê si Đào Huy Cường, Khua ƀuôn Ea Bhok, kyua mnuih ƀuôn sang sa ai tiê leh anăn bruă sang čư̆ êa alŭ wăl ngă bruă ktang phĭt, truh ară anei, ƀuôn Ea Bhok êgao leh 25 hruê amâo mâo ôh mnuih ruă mrâo, 44 čô mnuih ruă Covid-19 dưi kbiă mơ̆ng sang êa drao leh anăn bi leh wưng bi ktlah hjăn leh mdrao mgŭn. Dŭm anôk kwang dar gang mkhư̆ klei ruă tưo ăt dưi lăm lui, klei hdĭp mnuih ƀuôn sang ƀrư̆ lŏ wĭt msĕ aguah tlam.

“Ară anei klei hdĭp mda mphŭn lŏ wĭt msĕ aguah tlam snăn hmư̆ klei hâo hưn mơ̆ng Anôk mtrŭt mjhar bruă lŏ hma să kơ bruă đru kơ mnuih ƀuôn sang hdră mnêč msir mgaih klei mnơ̆ng ngă kơ ana pla mjing leh wưng sui amâo kriê dlăng. Mâo sa hdră ktrâo lač klă klơ̆ng djăp mta êa drao kơ ya mta ana msĕ si mdiê, kphê, tiu čiăng mnuih ƀuôn sang gĭr ngă bruă mkra mjing mâo boh mnga lu hĭn čiăng bi hrŏ klei luič liê kơ mnuih ƀuôn sang.”

Nguyễn Văn Dũng, Khua Knơ̆ng bruă sang čư̆ êa să Ea Bhok, kdriêk Čư̆ Kuin, čar Dak Lak brei thâo, mbĭt hŏng bruă đru kơ mnuih ƀuôn sang gang mkhư̆ hluăt ƀơ̆ng mnơ̆ng ngă, krŭ wĭt bruă lŏ hma hlăm wưng ƀuôn kwang dar, bruă sang čư̆ êa să ăt iêu mthưr phung mâo ai tiê kmah mđup brei mnơ̆ng dhơ̆ng, mnơ̆ng ƀơ̆ng huă kơ gŏ êsei ƀun, gŏ êsei hmaĭ kyua klei ruă Covid-19 čiăng digơ̆ hnưm hơĭt klei hdĭp mda. Dŭm hdră êlan đru ăt mâo alŭ wăl hmao pŏk ngă êjai:

“Să ăt kčĕ akâo kơ Bruă Đảng čar, Knơ̆ng bruă sang čư̆ êa să đru F0 snăn jing 10 kg braih, F1 kơ alŭ wăl jing 5kg. Phung mă bruă wĭt kơ alŭ wăl snăn să dôk hluê ngă Hdră mtrŭn 68 čiăng đru kơ mnuih ƀuôn sang hmao mâo prăk bi liê čiăng kơ mnuih ƀuôn sang lŏ dơ̆ng mă bruă ti alŭ wăl leh anăn lŏ dơ̆ng hâo hưn kơ mnuih ƀuôn sang amâo ngă ngơi mang, ngă jăk 5 mta klei mtă  mơ̆ng Phŭn bruă mdrao mgŭn.”

 Mơ̆ng sa anôk mâo klei ruă Covid-19 prŏng hĭn ti čar Dak Lak, bruă sang čư̆ êa leh anăn bruă djŏ tuôm pŏk ngă dŭm hdră mkhư̆ klei ruă tưp bi jăk, djŏ mmông, truh ară anei klei hdĭp mnuih ƀuôn sang ti ƀuôn Ea Bhok, să Ea Bhok, kdriêk Čư̆ Kuin lŏ dơ̆ng wĭt msĕ si aguah tlam. Ƀiădah, ti anăp klei ruă tưp ăt dleh ktuê dlăng, mnuih ƀuôn sang amâo dưi ngă ngơi mang ôh, ƀiădah brei hluê ngă dŭm klei kčah mtrŭn gang mkhư̆ klei ruă tưp./.

Pô mblang: H’Zawut Ƀuôn Yă