VOV4.Êđê- Aguah anei, klei kƀĭn tal 2 bruă kƀĭn ala gưl 15 klă klơ̆ng dưi pŏk kčưm hŏng êlan online bi mguôp hŏng kƀĭn klă anăp ti sang bruă kƀĭn ala leh anăn mbha jing 2 gưl: Gưl tal sa kƀĭn online mơ̆ng hruê 20-30/10, gưl tal 2 kƀĭn sa anôk mơ̆ng hruê 8-13/11. Sơnăn, bruă kƀĭn ala srăng mă bruă 17 hruê, hlăn anăn, mkăp kơ dŭm hdră êlan kƀĭn online tơdah klei ruă tưp Covid-19 lŏ dleh dưi ksiêm dlăng. Tui si hdră kčah, knŭk kna srăng mprăp êbeh 50 klei hưn mdah, hră hưn mdah, hdră mkăp, hdră ba mdah hŏng bruă kƀĭn ala. Hlăm klei kƀĭn tal anei, bruă kƀĭn ala srăng ksiêm dlăng lu klei hưn mdah yuôm bhăn, msĕ si boh tŭ dưn hlăm hdră êlan mđĭ kyar bruă duh mkra - ala ƀuôn, tĭng mkă ngăn prăk ala čar thŭn 2021, bruă gang mkhư̆ klei ruă tưp Covid-19, bi klă hdră êlan mđĭ kyar bruă duh mkra ala ƀuôn thŭn 2022, tĭng mkă ngăn prăk ala čar leh anăn hdră mkăp brei ngăn prăk gưl dlông thŭn 2022 (Hlăm anăn mâo bruă bi kdung hdră bi mlih ênoh prăk mlan). Dŭm klei hưn mdah mơ̆ng sang phat kđi gưl dlông, khua gĭt gai sang phat kđi gưl dlông, dŭm klei hưn mdah kơ bruă bi kdơ̆ng, gang mkhư̆ klei ƀơ̆ng ngăn, phung ngă soh hŏng klei bhiăn ala čar, bruă ƀuah mkra phung ngă soh thŭn 2021, bi mklin boh blŭ, klei akâo leh anăn boh tŭ dưn bruă ksiêm dlăng klei mgaih msir… ăt dưi hưn mdah hŏng bruă kƀĭn ala. Boh nik, bruă kƀĭn ala ksiêm dlăng, bi klă hdră čuăl mkă, yua lăn ala čar wưng thŭn 2021-2030, hdră tă truh kơ thŭn 2045 leh anăn hdră yua lăn 5 thŭn (2021-2025), bruă kơrŭ wĭt bruă duh mkra wưng thŭn 2021-2025.

Mĭn tĭng bruă kƀĭn ala srăng mă bruă wăt hruê năm leh anăn hruê kjuh, hŏng klei mkiêt mkriêm čiăng bi hrŏ hruê mmông, mprăp mă bruă wăt mmông mdei, mđĭ mmông mă bruă čiăng bi hrŏ hruê mmông klei kƀĭn ƀiădah ăt rơ̆ng kơ hnơ̆ng tŭ dưn. Anei jing klei hmăng hmưi djŏ mơ̆ng phung bi ala hlăm wưng dôk ngă bruă klam mdua, gang mkhư̆ klei ruă tưp leh anăn kơrŭ wĭt, mđĭ kyar bruă duh mkra.

Pô mblang: Y-Ƀel Êban