VOV4.Êđê - Aguah mbruê, ti Hà Nội, mkŏ mjing leh klei kƀĭn trông online ala čar bi mklin bruă djuê ana hlăm 9 mlan akŏ thŭn leh anăn bi êdah bruă klam phŭn hlăm 3 mlan knhal jih thŭn 2021. Klei kƀĭn trông anei hmư̆ klei klei blŭ mơ̆ng phung bi ala dŭm alŭ wăl mâo lu mnuih djuê ƀiă dôk hdĭp mda. Dŭm klei blŭ anăn kñăm kah mbha dŭm boh tŭ dưn dưi mâo hlăm bruă răng kriê klei hdĭp mnuih djuê ƀiă, gang mkhư̆ klei ruă tưp Covid-19 hlăm dŭm krĭng mnuih djuê ƀiă, krĭng čư̆ čhiăng. Êngao kơ anăn, dŭm klei blŭ ăt lač klă dŭm klei dleh dlan, kpăk êgun hlăm bruă tui ngă hdră êlan mrâo, mbĭt anăn lŏ kčĕ dŭm hdră êlan mgaih msir. Blŭ hlăm klei kƀĭn anăn, khua phŭn bruă, khua kiă kriê dhar bruă djuê ana Hầu A Lềnh brei thâo, hlăm wưng klei ruă tưp Covid-19 dôk mâo lu klei kyưt, anôk bruă ngă kơ dŭm djuê ana mơ̆ng gưl dlông truh kơ alŭ wăl čiăng lŏ gĭr ktưn hĭn bi lar bruă klam, bi mguôp hŏng dŭm anôk bruă hlăm bruă kđi čar, čiăng hdră êlan đru kơ mnuih djuê ƀiă leh anăn krĭng čư̆ čhiăng mâo boh tŭ dưn hĭn.

Y Ƀel pô mblang