Hlăm Hdră ngă mkra êlan dơ̆ng prŏng mrô 40 B să Tu Mơ Rông, (êlâo adih hlăm kdriêk Tu Mơ Rông, čar Kon Tum hđăp), găn alŭ 8, să Đăk Pxi (êlâo adih kdriêk Đăk Hà, čar Kon Tum hđăp) ară anei čar Quảng Ngãi, ai êwa ngă bruă dôk mjêč. Mơ̆ng aguah ưm truh kơ adiê tlam, maĭ mŏk ngă bruă jih hnơ̆ng, mjing ai êwa ngă bruă hlăm dŭm hruê akŏ thŭn mrâo.

Hdră anei mâo ênoh duh 220 êklai prăk, ngăn prăk gưl dlông đru lehanăn alŭ wăl, hŏng boh taih dlông êbeh 8,3 km. Hlăm anăn, kdrêč 800m găn Êlan dơ̆ng prŏng 40 B dưi mkra mđĭ, bi kdrêč adôk dưi mkra mrâo. Leh ngă ruê̆, êlan anei srăng nkŏ să Tu Mơ Rông lehanăn să Đăk Pxi, đru mtrŭt mđĭ kyar hdră duh mkra – ala ƀuôn, rơ̆ng klei êđăp ênang bruă lĭng kahan, răng mgang klei êđăp ênang lehanăn ba yua tŭ dưn lăn, mkŏ mjing krĭng mnuih ƀuôn sang dôk ktuê êlan anei.

Truh ară anei, hnơ̆ng ngă mkra mâo 45%, bi leh hdră tuh boh tâo ti êlan dơ̆ng prŏng 40 B. Pô ngă mkra ba nao leh 60 kdrăp mnơ̆ng mbĭt hŏng 80 čô mnuih mă bruă, nao đru ngă mkra ktuê êlan anei.

Phan Ngọc Duy, Khua gĭt gai hdră ngă mkra êlan dơ̆ng prŏng 40 B să Tu Mơ Rông găn alŭ 8, să Đăk Pxi, čar Quảng Ngãi brei thâo, êpul dôk ba nao 10 êpul ngă mkra, mđing kơ dŭm ktuê êlan phŭn ti êlan dơ̆ng prŏng 40 B kñăm rơ̆ng klei găn êrô mơ̆ng mnuih ƀuôn sang.

“Hluê si klei kuôl kă, wưng hluê ngă hlăm brô 900 hruê. Khă snăn, phung ngă mkra mâo mta kñăm mđĭ hdră ngă bruă, gĭr bi leh êlâo kơ wưng kčah. Klei ngă mkra ăt dleh dlan mơh, lu jing hdră kah mbha êlan nao rơ̆ng klei êrô êbat mơ̆ng mnuih ƀuôn sang, kyua ktuê êlan mrâo dưi ngă hluê ktuê êlan mâo leh mơ̆ng êlâo”.

Bi ti să Đăk Pek, čar Quảng Ngãi, hlăm kdriêk Đăk Glei, čar Kon Tum hđăp, dua hdră êlan klông phŭn dưi hluê ngă anăn jing Êlan mơ̆ng wăl krah Đăk Glei hđăp nao truh ti anôk bruă să Xốp, kdriêk Đăk Glei hđăp (ară anei jing să Xốp, čar Quảng Ngãi) lehanăn Hdră bruă Kban 16/5.

Hdră Êlan mơ̆ng wăl krah Đăk Glei hđăp nao truh ti anôk bruă să Xốp mâo boh dlông êbeh 17 km, dưi mkra hluê hnơ̆ng čuăn êlan klông krĭng ƀuôn sang gưl A, ƀô̆ êlan prŏng 6,5 m. Hdră dưi pŏk ngă mơ̆ng mlan 12/2024 truh kơ mlan 12/2026, ară anei mâo hlăm brô 10% boh tŭ yuôm klei kuôl kă, ară anei dôk mđing ngă mkra.

Hdră kban 16/5 mâo ênoh duh bi liê êbeh 86 êklai prăk, mâo kban lehanăn êlan dua akŏ kban hŏng boh taih dlông 648 m. Truh ară anei, hnơ̆ng ngă bruă mâo êbeh 75% boh tŭ yuôm klei kuôl kă. Êpul ngă mkra ba leh êdah êdâo mbĭt hŏng 20 čô mă bruă mkŏ mjing hdră ngă bruă. Dŭm bruă phŭn dưi ngă leh, ară anei dôk mđing ngă mkra dŭm bruă nah tluôn, gĭr bi leh bruă tuh bêtông, dưm pui mngač čiăng dưi găn êrô êlâo kơ Têt Djuê ana. Nguyễn Thị Thương, Khua knơ̆ng bruă sang čư̆ êa să Đăk Pek, čar Quảng Ngãi brei thâo:

“Hŏng hdră mkra kban 16/5, hnơ̆ng ngă bruă mâo hlăm brô 80% ênoh yuôm hdră mă bruă. Să ksiêm dlăng kjăp êpul ngă bruă čiăng gĭt gai, mđĭ ai, mđĭ klei thâo mnuih mă bruă, ba yua kdrăp mnơ̆ng, mtrŭt mđĭ pral hdră msir mghaih anôk ala kñăm mjing klei găl kơ hdră ngă bruă”.

Thŭn 2026 mâo boh tŭ yuôm bhăn, thŭn mkŏ mjing Klei bi kƀĭn phung bi ala kluôm ala čar tal XIV mơ̆ng Đảng, ruah Anôk bruă kƀĭn ala gưl XVI lehanăn Êpul gơ̆ng bruă ƀuôn sang dŭm gưl. Anei ăt jing thŭn pŏk wưng đĭ kyar mrâo hŏng lu klei găl lehanăn lông dlăng. Bruă pŏk hluê ngă hdră kčah mđĭ kyar bruă duh mkra – ala ƀuôn thŭn 2026 mơ̆ng čar Quảng Ngãi, hlăm anăn mâo bi leh anôk bruă nah gŭ êlan klông srăng mâo dŭm klei găl čiăng mđĭ kyar.

Hdră mtrŭn Klei bi kƀĭn bruă Đảng čar Quảng Ngãi tal sa, wưng thŭn 2025 – 2030 bi mklă mđing kơ hdră duh bi liê, ba yua tŭ dưn klei găl mâo čiăng mđĭ kyar anôk bruă nah gŭ mdrăm mbĭt, mrâo mrang, mđing kơ rĭng taih kbưi, krĭng mnuih djuê ƀiă. Ai êwa ngă bruă ti dŭm hdră bruă krĭng čư̆ čhiăng hlăm dŭm hruê akŏ thŭn mrâo čiăng klei bi êdah klă kơ klei gĭr anăn, mjing tur knơ̆ng čiăng kơ alŭ wăl đĭ kyar hlăm wưng mrâo. Nguyễn Hoàng Giang, Khua knơ̆ng bruă sang čư̆ êa čar Quảng Ngãi brei thâo:

"Wưng hluê ngă dŭm hdră bruă lehanăn hdră mkăp prăk duh bi liê knŭk kna thŭn 2026 brei rơ̆ng djŏ hdră kčah, anei jing bruă klam kđi čar yuôm bhăn mơ̆ng grăp êpul êya, anôk bruă, pô duh bi liê kơ hdră bruă. Brei mđing ruh mtlaih jih klei dleh dlan, msir mghaih jih klei dôk kpăk đuôm, mdei ngă bruă; ruh mtlaih klei dleh kpăk kơ anôk bruă nah gŭ, lăn ala, klei ngă hră mơar, mđĭ hdră msir mghaih anôk ala čiăng mđĭ pral wưng duh kơ dŭm hdră bruă êlan klông yuôm bhăn ti alŭ wăl čar”./.