Mrâo anei, čar Dak Lak mkŏ mjing leh Klei bi kƀĭn ksiêm wĭt tuôr lehanăn mđĭ kyar anôk bruă čhưn ênguê kñăm tĭng dlăng klei găl mâo mơ̆ng anôk bruă hiu čhưn ênguê alŭ wăl, mbĭt anăn mjing klei bi kƀĭn trông čiăng phung thơ̆ng kơ bruă, phung kriê dlăng lehanăn anôk bruă duh mkra bi trông, ba mdah hdră msir mđĭ kyar bruă hiu čhưn ênguê hơĭt kjăp, mđĭ ai bi ktưn, đru hluê ngă mta kñăm mđĭ kyar bruă duh mkra dua mrô wưng thŭn 2026 – 2030.

Ti anôk bi kƀĭn, lu phung thơ̆ng kơ bruă lehanăn anôk bruă duh mkra bi mklă, bruă bi hgŭ wăl anôk đĭ kyar plah wah Lăn dap kngư lehanăn ktuê hang ksĭ pŏk leh klei găl prŏng kơ anôk bruă hiu čhưn ênguê Dak Lak. Mơ̆ng sa anôk hing ang kơ kphê, dhar kreh čing čhar, ƀuôn sang, ênao Lăk, Ƀuôn Đon lehanăn wăl anôk lăn dliê, Dak Lak ară anei lŏ mâo klei găl mơ̆ng êa ksĭ, kplang, kdrăn boh tâo mbĭt hŏng dŭm boh tŭ yuôm dhar kreh lehanăn mnơ̆ng ƀơ̆ng huă krĭng ktuê hang ksĭ.

Klei bi mguôp plah wah êa ksĭ lehanăn čư̆ dliê dưi dlăng jing hdră nao mâo lu klei găl kñăm mjing dŭm hdră hiu čhưn ênguê bi hgŭm krĭng, bi tai wưng dôk čhưn lehanăn mđĭ hdră tui ksiêm kơ phung tuê hiu čhưn. Khă snăn, hluê si phung thơ̆ng kơ bruă, klei găl knŏng dưi mđĭ lar tŭ dưn tơdah dưi mjing dŭm hdră hiu čhưn jăk siam, mâo ai bi ktưn. Nguyễn Hữu Y Yên, Khua kiă kriê anôk bruă atăt tuê hiu čhưn Saigontourist brei thâo:

“Leh ktuê êlan êran pral mkŏ Ƀuôn prŏng Hồ Chí Minh truh ti Tuy Hòa knŏng dôk 7 mmông. Si srăng ngă čiăng kơ Tuy Hòa mâo hdră hiu čhưn jăk hĭn. Êngao kơ mnei êa ksĭ msĕ ară anei, snăn brei drei lŏ duh thiăm krĭng hlăp lêñ, snăn kâo mĭn srăng mâo lu hĭn phung tuê truh ti Tuy Hòa”.

Mbĭt hŏng dŭm klei găl mâo, phung bi ala ăt hưn mdah dŭm klei kpăk gun hlăm hdră mđĭ kyar anôk bruă hiu čhưn ênguê msĕ si anôk bruă êlan klông ka bi knar, hnơ̆ng tŭ jăk hdră mă ka năng hŏng klei găl mâo, hdră mtrŭt mđĭ bruă hưn mthâo adôk êdu kƀah lehanăn bruă ba yua kdrăp mrâo ka năng hŏng klei đĭ kyar hlăm ênuk anei. Lu klei blŭ ba mdah brei mâo klei bhiăn ciăng jak iêo hdră duh bi liê hlăm anôk bruă hiu čhưn, đru kơ anôk bruă duh mkra mkŏ mkra dŭm hdră hiu čhưn mrâo, pŏk mlar dŭm hdră hiu čhưn bi hgŭm krĭng.

Hlăm klei găl mđĭ kyar bruă hiu čhưn ênguê mtah, kreh dhar lehanăn hơĭt kjăp, Dak Lak mâo čang hmăng srăng ba yua tŭ dưn wăl anôk đĭ kyar mrâo kñăm mjing dŭm hdră hiu čhưn jiă knhuah mdê hjăn, đru mđĭ kơhưm hlăm hră kak lăn hiu čhưn ênguê ala čar. Mđing hmư̆ dŭm klei blŭ ti anôk bi kƀĭn, Đào Mỹ, Kơiăng khua knơ̆ng bruă sang čư̆ êa čar Dak Lak brei thâo, alŭ wăl srăng mđing pŏk ngă dŭm hdră msir phŭn, kñăm đru kơ anôk bruă duh mkra lehanăn mđĭ kyar dŭm anôk hiu čhưn.

“Mkŏ mkra hră kak lăn anôk truh hiu čhưn jing tal sa. Tal dua jing brei mâo hdră mtrŭn đru lŏ pŏk tuôr hiu čhưn, čiăng mkra dŭm anôk truh. Dưi ngă snăn, anôk bruă duh mkra srăng hơĭt ai tiê pŏk tuôr hiu čhưn, mkŏ mkỉa anôk truh čiăng jak iêu tuê hiu čhưn.

Amâo djŏ knŏng mjưh ti dŭm hdră êlan phŭn, klei bi kƀĭn lŏ čih yap dŭm knhuang nao klă klơ̆ng kñăm mtrŭt mđĭ hdră bi hgŭm mđĭ kyar bruă hiu čhưn ênguê. Knơ̆ng bruă Dhar kreh, Mjuăt ktang asei mlei lehanăn Hiu čhưn ênguê čar Dak Lak siñê leh hdră bi hgŭm hŏng dŭm anôk bruă duh mkra atăt tuê hiu čhưn, mbĭt anăn dŭm anôk bruă duh mkra hiu čhưn, anôk đih đăm, krĭng hiu čhưn, sang čhĭ mnơ̆ng ƀơ̆ng, anôk bruă dŭ mdiăng ăt siñê dŭm klei kuôl kă bi hgŭm, pŏk ngă hdră mtrŭn mdul ênoh lehanăn mđĭ hnơ̆ng tŭ jăk čiăng mtrŭt mđĭ bruă hiu čhưn ênguê.

Hdră bi hgŭm krĭng ăt mâo dŭm alŭ wăl mtrŭt mđĭ. Mrâo anei, Lâm Đồng lehanăn Khánh Hòa ăt mkŏ mjing lu hdră mtrŭt mđĭ bruă duh bi liê, mnia mblei lehanăn hiu čhưn ênguê thŭn 2026, pŏk klei găl bi hgŭm krĭng Lăn dap kngư lehanăn hang ksĭ Dhŭng kwar krah. Dua alŭ wăl siñê leh 8 hră mơar bi hdơr plah wah anôk bruă duh mkra kñăm mtrŭt mđĭ bruă duh bi liê, mnia mblei lehanăn hiu čhưn ênguê. Hlăk Khánh Hòa jing anôk bruă duh mkra êa ksĭ phŭn hŏng anôk bruă hiu čhưn ênguê đĭ kyar snăn Lâm Đồng dưn klei găl kơ bruă yan adiê, hiu čhưn lăn mnga êa mơak, mdei săn lehanăn bruă lŏ hma yua kdrăp mrâo. Klei bi hgŭm hŏng dŭm ktuê êlan phŭn msĕ si Êlan dơ̆ng prŏng mrô 1, êlan êran pral Dưr – dhŭng, Êlan dơ̆ng prŏng 27 C, êlan treng Dưr – Dhŭng mbĭt hŏng kdrŭn ksĭ lehanăn êlan phiơr dôk mjing dŭm hdră hiu čhưn ênguê, pŏk mlar wăl anôk đĭ kyar lehanăn jak iêo hdră duh bi liê.

Mơ̆ng krĭng čư̆ dliê truh kơ êa ksĭ mtah, klei bi hgŭm dŭm alŭ wăl Lăn dap kngư lehanăn ktuê hang ksĭ Dhŭng kwar krah dôk pŏk êlan kơ hdră mđĭ kyar mrâo kơ hdră hiu čhưn ênguê. Hlăk dŭm klei găl dưi bi hgŭm jing ai ktang prŏng, anei srăng jing boh kdrŭt yuôm bhăn čiăng krĭng đĭ kyar kdlưn hĭn, đru mguôp hlăm ktuê êlan kpưn đĭ mơ̆ng ala čar hlăm ênuk gưl mrâo./.