Leh hmư̆ dŭm klei hưn mdah leh anăn klei bi trông hlăm mmông mă bruă, Khua gĭt gai Đảng, Khua Lăn čar Tô Lâm mñă ktang, bi kluôm hdră bhiăn lăn čar leh anăn mlih mrâo hdră bhiăn mâo klei jĕ giăm nao mbĭt, bi mguôp kjăp, čiăng mâo klei gĭt gai rơ̆ng kơ dŭm bruă čih mkra hdră bhiăn, ngă hdră bhiăn leh anăn mlih mrâo hdră bhiăn jing bruă sa anăn, hrăm mbĭt, tŭ dưn. Khua gĭt gai Đảng, Khua Lăn čar Tô Lâm lač klă, bruă bi klyôm amâo djŏ knŏng klei mkŏ dăp ƀiădah lŏ mkŏ wĭt klei gĭt gai, ktrâo lač mơ̆ng gưl dlông hŏng bruă klam mkŏ mjing, bi kluôm Knŭk kna ala čar yang ƀuôn ngă phŭn Việt Nam.

Khua gĭt gai Đảng, Khua Lăn čar Tô Lâm mñă, bi klă bruă klam, kơhưm, bruă knuă mơ̆ng Êpul kiă kriê bruă knuă gưl dlông leh anăn Phŭn bruă hdră bhiăn, mbĭt anăn čiăng bi klă, djŏ bruă klam mơ̆ng grăp anôk bruă leh anăn bi klă hdră êlan bi mguôp, lŏ dơ̆ng bi kluôm êpul khua gĭt gai. Khua gĭt gai Đảng, Khua Lăn čar Tô Lâm jao kơ bruă Đảng phŭn bruă hdră bhiăn gĭt gai, bi mguôp hŏng Êpul kiă kriê bruă knuă gưl dlông mđĭng hmư̆ ênŭm klei bi trông hlăm klei kƀĭn, bi kluôm hră mơar, Hưn mdah hŏng Phŭn bruă kđi čar.