Mmông mă bruă kƀĭn hlăm Hdră bruă “mđĭ klei dưi mdrơ̆ng mơ̆ng bruă lŏ hma hnơ̆ng điêt hĭng klei djăp phŭn êa kyua klei bi mlih yan adiê krĭng Lăn Dap Kngư leh anăn Dhŭng kwar Krah” (SACCR) leh anăn Hdră bruă điêt “Mđĭ boh tŭ yua êa kơ dŭm čar hmăo kyua adiê không kƀah êa” (WEIDAP) yua prăk čan Knơ̆ng prăk mđĭ kyar Asi (ADB).  Leh giăm 5 thŭn pŏk ngă ti Dak Lak, Hdră bruă SACCR đru mđĭ klei dưi mdrơ̆ng hŏng klei bi mlih yan adiê, mkra mđĭ hdră duh ƀơ̆ng leh anăn đru tă hdră mđĭ kyar bruă duh mkra bi hrŏ djah kơ mnuih ƀuôn sang alŭ wăl. Khădah snăn, lu mta bruă yuôm bhăn hlăm hdră bruă, boh nik jing hnơ̆ng mkŏ mjing dŭm anôk pom êa mrâo bi liê êbeh 41 êklai prăk, ka mâo 4% ênoh prăk ODA.

 Hlăm mmông mă bruă, bi ala UNDP ti Việt Nam bi mni kơ klei gĭr mơ̆ng čar Dak Lak hlăm klei pŏk ngă hdră bruă, mbĭt anăn mñă anei jing hdră bruă yuôm bhăn snăk hŏng klei djăp phŭn êa leh anăn hdră duh ƀơ̆ng kơ mnuih ƀuôn sang. Ñu mtă kơ Dak Lak mjêč bi leh hră mơar hdră bruă, hnưm mâo hră mơar djŏ tuôm kơ klei mkra mlih ênoh prăk leh anăn wưng hlue ngă hdră bruă truh knhal jih thŭn 2027.