Čar Dak Lak ară anei dôk ngă bruă rŭ mdơ̆ng 3 sang hră mlir gưl hriăm ti dŭm dă Ia Lôp, Ia Rvê leh anăn Ea Bŭng, hŏng ênoh duh bi liê giăm 127 êklai prăk. Truh kơ ară anei, lu mta bruă hlăm hdră dưi mâo hlăm brô 47% ênoh bruă. Ti anăp klei čuăng bi leh dŭm sang hră čiăng hmao ba yua hlăm thŭn hriăm mrâo, Khua bruă Đảng čar Dak Lak Lương Nguyễn Minh Triết mñă kơ dŭm anôk bruă lŏ ksiêm dlăng klei mă bruă, mđĭ ênoh mnuih mă bruă, kdrăp yua, mbĭt anăn jao kơ dhar bruă sang hră mơar čŏng duah mnuih mă bruă, phung nai, mprăp djăp yua, anôk hđeh dôk leh anăn mkŏ mjing hdră êlan hâo hưn, mtrŭt mjhar hđeh sang hră nao hriăm mơ̆ng akŏ thŭn hriăm mrâo.

Čar Dak Lak ăt mñă brei bi mâo djăp  mnơ̆ng ƀơ̆ng huăn doh êƀăt kơ hđeh sang hră, sang hră dưi bi leh hlŏng ngă bruă mtam. Năng mđing, Khua bruă Đảng čar Dak Lak mñă brei mâo hdră êlan tiŏ nao êpil ngă bruă đru rŭ mdơ̆ng tơdah čiăng êdi, hlăm anăn mâo hdră êlan bi mguôp hŏng lĭng kahan čiăng bi pral bi leh sang hră êlâo kơ hruê 30/7.