Hlue si Khua phŭn bruă ngăn prăk Nguyễn Văn Thắng, čiăng hlue ngă klei kñăm mơ̆ng Hdră mtrŭn kčah leh hlăm hdră mđĭ kyar lăn čar wưng 2026 - 2030, “kƀĭn bi leh kluôm, hrăm mbĭt klei bhiăn” dưi bi mklă jing bruă klam phŭn. Hŏng bruă Ngăn prăk, bi leh klei bhiăn duh mkra jing asăp mtrŭn čiăng kơ dhar bruă lŏ dơ̆ng mlih mrâo klei mĭn, bruă ngă. Nguyễn Văn Thắng lač klă:

“Klei bhiăn hlue ngă djăp ênŭm djŏ mmông leh anăn pŏk ngă tŭ dưn hdră mtrŭn mơ̆ng Đảng kơ klei mđĭ kyar dŭm bruă duh mkra, hlue ngă klei čang hmăng mđĭ kyar bruă ngă leh anăn boh tŭ klă klơ̆ng. Mđĭ ktang klei kriê dlăng leh anăn prăk bi liê dŭm anôk bruă duh mkra knŭk kna, mđĭ klei tŭ dưn ngă bruă boh nik bruă bi liê kơ hdră bruă čiăng rơ̆ng klei atăt gai êjai rơ̆ng boh tŭ ngăn prăk êjai. Bi mklă leh anăn mđĭ kyar bruă klam phŭn mơ̆ng bruă duh mkra knŭk kna. Mđĭ kyar bruă duh mkra êngao knŭk kna klă sĭt jing sa boh kdrŭt yuôm bhăn hĭn mơ̆ng bruă duh mkra. Đru mđĭ pŏk mlar anôk ba čhĭ kơ bruă duh mkra êpul lu, êpul hgŭm bruă”.

Klei bi kƀĭn tal XIV lŏ dơ̆ng bi mklă klei gĭr kđi čar mơ̆ng Đảng hlăm bruă kčah  dhar kreh leh anăn anak mnuih hlăm anôk phŭn hdră mđĭ kyar lăn čar. Anei amâo djŏ knŏng jing klei lŏ čuê sa anăn klei mĭn mơ̆ng Đảng mơ̆ng dŭm wưng krŭ kdơ̆ng leh anăn mlih mrâo ôh, ƀiădah lŏ jing knhuang đĭ kyar mrâo hlăm klei mĭn hdră bruă. Nguyễn Văn Hùng, Khua phŭn bruă dhar kreh mjuăt asei mlei leh anăn hiu čhưn ênguê pŏk 6 êpul hdră msir kñăm “Mđĭ lar ai ktang hlăm lam dhar kreh, anak mnuih Việt Nam - tur knơ̆ng mđĭ kyar pral leh anăn kjăp lăn čar hlăm ênuk mrâo”

“Mlih mrâo ktang kluôm klei mĭn thâo săng kơ mđĭ kyar dhar kreh, bi mklă bi liê kơ dhar kreh jing bi liê mđĭ kyar kjăp mơ̆ng lăn čar kơ êdei anăp djuê ana. Brei mđĭ klei thâo êpul ngă bruă dhar kreh, hlei pô mjing leh anăn atăt gai ênoh yuôm dhar kreh mơ̆ng ênuk mrâo. Dlăng klei đĭ kyar bruă tuh tia mkra mjing dhar kreh leh anăn bruă duh mkra mbruă jing boh kdrŭt đĭ kyar mrâo, đru mguôp hlăm klei đĭ kyar GDP”.

Hlue si Y Thanh Hà Niê Kđăm, Khua dlăng bruă Đảng čar Lâm Đồng, klei đăo knang mơ̆ng yang ƀuôn hŏng Đảng jing tur knơ̆ng kjăp čiăng hlue ngă tŭ dưn klei kñăm kluôm Đảng kčah leh. Hlăm boh klei lăn čar dôk mŭt hlăm wưng đĭ kyar mrâo hŏng lu klei găl leh anăn klei lông dlăng bi mguôp, čiăng mkra mđĭ bruă kđi čar krĭng mnuih djuê ƀiă, Y Thanh Hà kčĕ:

“Mđĭ mkŏ mjing leh anăn mđĭ lar bruă klam êpul ngă bruă kđi čar phŭn, boh nik phung mâo kơhưm hlăm djuê ana, klei đăo; păn kjăp boh klei mnuih ƀuôn sang. Pral gang mkhư̆, bi kdơ̆ng hŏng êpul ngă soh, phung bi rai knŭk kna, mplư mnuih ƀuôn sang bi kdơ̆ng hŏng Đảng, Knŭk kna drei. Ngă jăk bruă hŏng tač êngao hlăm yang ƀuôn, boh nik mđĭ lar knhuah gru bi hgŭm plah wah dŭm alŭ wăl knông lăn hŏng ala čar mkăn. Mtrŭt mjhar mnuih ƀuôn sang kriê pioh leh anăn mđĭ lar, răng kriê knhuah dhar kreh djuê ana, klei bhiăn, mđĭ klei jăk siam leha năn klei bi hgŭm, klei ktưn hưn djuê ana, anei jing klei phŭn čiăng bi kdơ̆ng hŏng klei hmăi amâo jăk mơ̆ng êngao, msĕ si klei đăo soh,  phung ngă soh hluh knông lăn.”

Sa ai êlam hŏng klei mĭn gĭt gai: “Mnuih ƀuôn sang jing phŭn, jing pô kriê dlăng, jing klei kñăm lehh anăn boh kdrŭt mơ̆ng klei đĭ kyar” mâo lač hlăm klei bi kƀĭn, Nguyễn Thị Thúy Lam, Khua dlăng bruă đảng să Tân Khánh Trung, čar Đồng Tháp lač, sa lăn čar kjăp ktang amâo djŏ knŏng mkă hŏng hnơ̆ng bruă duh mkra amâodah hnơ̆ng đĭ kyar GDP ôh, ƀiădah yuôm bhăn hĭn jing hŏng hnơ̆ng klei hdĭp leh anăn ênoh mrô jăk mơak mnuih ƀuôn sang. Klei mdrŏng sah  klă sĭt jing yuôm bhăn tơdah grăp čô mnuih dưi hdĭp hlăm klei trei mđao, êngiê, êđăp ênang leh anăn jăk mơak. Nguyễn Thị Thúy Lam brei thâo:

“Anăn jing anôk klei hdĭp mnuih ƀuôn sang dưi hơĭt, êđăp ênang, jăk mơak. Mnuih ƀuôn sang amâo djŏ knŏng djăp mnơ̆ng ƀơ̆ng huă ôh ƀiădah  lŏ dưi dưn klei mdrao mgŭn, sang hră, dhar kreh jăk hĭn; dưi hdĭp hlăm wăl hdĭp mda jăk . Anăn jing, mâo bruă sang čư̆ êa giăm mnuih ƀuôn sang, duh kơ mnuih ƀuôn sang; sa êpul bruă knŭk kna thâo “uêñ kơ klei mnuih ƀuôn sang čiăng, klei mơak mnuih ƀuôn sang”. Anăn jing, anôk mâo sa êpul bi hgŭm, anôk ƀuôn sang mâo klei khăp kjăp, ênoh yuôm dhar kreh djuê ana dưi mpŭ leh anăn kriê pioh”.

Mơ̆ng klei tŭ jing Klei bi kƀĭn tal XIV mơ̆ng Đảng, grăp čô knuă druh đảng viên hŏng mnuih ƀuôn sang gĭr hlue ngă hdră êlan, hdră mtrŭn mơ̆ng Đảng jing bruă ngă klă klơ̆ng, mă klei tŭ dưn boh sĭt leh anăn jăk mơak mnuih ƀuôn sang jing giê mkă jăk hĭn. Mơ̆ng bi leh klei bhiăn duh mkra, mđĭ kyar jăk dŭm bruă duh mkra, truh kơ mđĭ lar dhar kreh, anak mnuih leh anăn mđĭ bruă kđi čar nah gŭ, jih jang mđing kơ klei kñăm mkŏ mjing sa lăn čar đĭ kyar pral, kjăp, jiă knhuah djuê ana leh anăn bŏ hŏng klei đăo knang. Anei jing tur knơ̆ng yuôm bhăn čiăng hlue ngă klei čang hmăng kơ sa Việt Nam mdrŏng sah, jăk mơak hlăm ênuk đĭ kyar mrâo.