Tlam (22/9), Knơ̆ng gĭt gai lĭng kahan čar Dak Lak mkŏ mjing leh hdră bi mjĕ mjuk, bi trông plah wah ênuk gưl phung knuă druh, lĭng kahan ƀri bi hdơr 80 thŭn Hruê knhuah Êpul kahan djă phao ktuang čar (23/9/1945 – 23/9/2025). Sui hŏng anei 80 thŭn, hruê 23/9/1945, Tỉnh bộ Việt Minh Dak Lak bi mklă mkŏ mjing Anôk bruă lĭng kahan čar, mkŏ mjing êpul kahan dkă phao ktuang phŭn jing Tiểu đoàn Giải phóng quân N’Trang Lơng lehanăn mkŏ mjing anôk bruă lĭng kahan mơ̆ng čar truh kơ nah gŭ. Găn 80 thŭn kdơ̆ng mblah lehanăn đĭ jing, phung knuă druh, lĭng kahan amâo mdei duh myơr, săn asei, đru mguôp răng mgang Ala čar, jing anôk jưh knang kjăp mơ̆ng Đảng, Knŭk kna lehanăn Mnuih ƀuôn sang.

Hŏng akŏ “Kjăp ktang ti gŭ hla čhiăm gru ala čar”, hdră bi mjĕ mjuk ba leh dŭm klei yăl dliê, klei bi hdơr kơ dŭm ênuk gưl phung khua kiă kriê hlăm dŭm thŭn mlan dleh knap, mbĭt anăn hưn mdah dŭm hdră mtrŭn mkŏ mjing êpul kahan hlăm wưng mrâo. Ênuk gưl hđeh hruê anei ăt bi êdah klei gĭr lŏ čuê, mđĭ lar knhuah gru aê ama, krơ̆ng kjăp klei êđăo knang lehanăn klei mĭn cách mạng. Ƀri gưl anei, Knơ̆ng gĭt gai lĭng kahan čar bi hgŭm hŏng bruă Đoàn čar Dak Lak ksiêm wĭt klei bi lông online tui ksiêm kơ 80 thŭn Hruê knhuah Êpul kahan djă phao ktuang čar, jao 28 klei pah mni kơ dŭm êpul, mnuih mâo mă boh tŭ êdah êdi./.