Êbeh sa hruê kăm leh êdeh container drăm hlăm sang mnuih ƀuôn sang ngă kơ 3 čô djiê, mnuih ƀuôn sang hdĭp ktuê êlan Hồ Chí Minh ti krĭng sang mnia 312, să Dak Rla, kdriêk Dak Mil, čar Dak Nông, ăt ka jih klei huĭ hyưt. Phạm Thị Ngọc Lan - sa čô mnuih ƀuôn sang hdĭp hlăm krĭng wăl brei thâo, kdrêč êlan anei siam snăk ngă kơ lu phung mgăt êdeh amâo răng ôh, êran pral. Kyua anăn, knŏng hlăm dŭm thŭn êgao, tinei mâo leh 8 čô djiê, 6 čô êka kyua klei bi drăm hlăm êlan klông.

 “Kâo čhĭ mnia ti sang mnia sui thŭn leh, ƀuh krĭng anei khăng mâo klei bi drăm kjham snăk. Ară anei kâo čang hmăng êpul kahan ksiêm hlăm êlan klông mđĭ klei ksiêm dlăng hlăm kdrêč êlan huĭ hyưt anei; anôk bruă djŏ tuôm brei hnưm maoa hdră msir bi hrŏ hnơ̆ng êran êdeh, dưm Camera bi kmhal êdei čiăng êđăp ênang kơ mnuih ƀuôn sang čhĭ mnia, hdĭp mda djiêu êlan.”

Lê Văn Hoàng –  Khua Knơ̆ng bruă sang čư̆ êa kdriêk Dak Mil, čar Dak Nông, hâo hưn, ktuê êlan Hồ Chí Minh găn kdriêk mâo 2 anôk huĭ hyưt mâo klei bi drăm hlăm êlan klông jing kdrêč găn wăl krah să Thuận An leh anăn krĭng sang mnia 312 să Dak Rla. Dŭm anôk anei khăng mâo klei bi drăm hlăm êlan klông kjham snăk, ngă djiê lu mnuih leh anăn jhat ri lu êdeh êdâo, luč liê kơ bruă duh mkra. Kơ klei lăm lui dŭm anôk huĭ hyưt luč êđăp ênang hlăm êlan klông anei, Lê Văn Hoàng lač mđĭ ktang klei hâo hưn mđĭ klei thâo săng phung nao hlăm êlan klông jing ka djăp ôh, ƀiădah brei mđĭ êlan klông nah gŭ.

        “Kdriêk mđĭ ktang hâo hưn, mđĭ klei thâo săng mnuih ƀuôn sang hlue ngă bi jăk, boh nik phung găt êdeh kơ hnơ̆ng leh anăn dŭm hdră kčah djŏ tuôm kơ klei êđăp ênang hlăm êlan klông. Êpul bruă djŏ tuôm brei mđĭ ksiêm dlăng ktuê dlăng, hmao ƀuh klei ngă soh, msir mgaih hlue si hdră kčah. Čiăng msir mgaih jih hnơ̆ng bi liê anôk bruă nah gŭ hlăm êlan klông. Sitôhmô pŏk mlar dŭm ktuê êlan, brei ngă hrăm mbĭt lu hdră msir”.

Čar Dak Nông mâo 3 ktuê êlan dơ̆ng ala čar găn jing 14, 14C, 28.  Bruă djŏ tuômm alŭ wăl bi mklă hlăm dŭm ktuê êlan ala čar leh anăn dŭm êlan dơ̆ng čar dôk mâo 18 anôk huĭ hyưt mâo klei bi drăm hlăm êlan klông. Hlăm mkrah akŏ thŭn anei, tti Dak Nông mkŏ mjing 57 klei bi drăm hlăm êlan klông, ngă djiê 43 čô, êka 53 čô. Mkă hŏng wưng anei thŭn dih, klei bi drăm hlăm êlan klông hrŏ 12 klei, hrŏ 2 čô djiê, ƀiădah đĭ 18 čô êka. Thượng tá Văn Ngọc Lập, K’iăng Khua adŭ bruă kahan ksiêm êlan klông kahan ksiêm čar Dak Nông brei thâo, klei bi drăm hlăm êlan klông ƀiădah dŭm klei truh kjham đĭ, lu jing ti dŭm anôk mâo klei bi drăm hlăm êlan klông. Čiăng bi mkhư̆ klei bi drăm hlăm êlan klông, êpul kahan ksiêm hlăm êlan klông mđĭ bruă hiu ksiêm dlăng, msir mgaih klei ngă soh.

 “Hlăm wưng kơ anăp, Adŭ bruă kahan ksiêm hlăm êlan klông lŏ dơ̆ng ngă klei ksiêm dlăng jih hruê mlam, leh anăn ngă akŏ mkă hnơ̆ng êran hlăm êlan klông êdeh mdiăng tue, êdeh container, êdeh mdiăng mnơ̆ng… hlăm kluôm ktuê êlan, boh nik ti dŭm anôk huĭ mâo klei bi drăm hlăm êlan klông, hâo hưn kơ mnuih ƀuôn sang ti krĭng wăl sang mnia mđĭ klei thâo săng hlue ngă Hdră bhiăn hlăm êlan klông, bi hrŏ klei bi drăm hlăm êlan klông.”

Kñăm msir mgaih dŭm anôk huĭ mâo klei bi drăm hlăm êlan klông hlăm dŭm ktuê êlan ala čar, êlan dơ̆ng čar, Anôk bruă răng mgang klei êđăp ênang hlăm êlan klông čar Dak Nông mtă kơ êpul bruă djŏ tuôm bi hgŭm hŏng dŭm alŭ wăl mđĭ ktang hâo hưn mđĭ klei thâo săng hlue ngă Hdră bhiăn hlăm êlan klông, hlue ngă hrăm mbĭt hdră bruă, msir bi djŏ phung ngă soh hlăm êlan klông. Mbĭt anăn lŏ dơ̆ng ksiêm dlăng, ktuê dlăng, kčĕ akâo kơ Knơ̆ng bruă sang čư̆ êa čar Dak Nông, anôk bruă duh mkra kriê dlăng dŭm ktuê êlan BOT bi liê mđĭ anôk bruă êlan klông nah gŭ, msir mgaih dŭm anôk huĭ mâo klei bi drăm hlăm êlan klông hlăm dŭm ktuê êlan, boh nik êlan dơ̆ng ala čar 14 (êlan Hồ Chí Minh) leh anăn êlan dơ̆ng ala čar 28./.