Aguah 14/1, ti Hà Nội, Khua knŭk kna Phạm Minh Chính gĭt gai Klei bi kƀĭn tal 5 Êpul hgŭm kriê dlăng krĭng Dap mnai krông Hồng. Hluê klei hưn, thŭn 2024, hdră duh mkra – ala ƀuôn mơ̆ng krng krông Hồng lŏ dơ̆ng đĭ kyar pral, ba akŏ hlăm bruă hluê ngă dŭm hdră êlan phŭn lehanăn mlih mrâo gru hmô đĭ kyar; mđĭ kyar bruă duh mkra êgao hnơ̆ng kah knar kluôm mơ̆ng ala čar lehanăn krĭng Ngŏ kwar Dhŭng; ba akŏ hlăm bruă hrui wĭt ngăn prăk knŭk kna, ba čhĭ mnơ̆ng kơ ala tač êngao, jak iêu klei duh bi liê ala tač êngao.

Blŭ ti knăm anei, Khua knŭk kna Phạm Minh Chính mñă, hlăm wưng ti anăp, krĭng Dap mnai krông Hồng brei mđĭ kyar 2 mrô čiăng hrăm mbĭr hŏng kluôm ala mŭt hlăm ênuk gưl mrâo hluê hdră êlan mơ̆ng Khua gĭt gai Đảng Tô Lâm. Kyua anăn, Êpul hgŭm mđing tĭng dlăng dŭm bruă dưi ngă, ka dưi ngă, ksiêm dlăng, hlak mblang mta phŭn, klei hriăm hlăm hdră kiă kriê mơ̆ng dŭm Phŭn, dhar bruă, alŭ wăl, mơ̆ng anăn mđĭ lar dŭm klei dưi ngă, msir mghaih klei dleh dlan, ruh mtlaih klei gun kpăk. Khua knŭk kna mtă brei gĭr hĭn, ngă bruă kjăp hĭn, mâo mta phŭn, ya bruă ngă brei bi leh mtam./.