Ti dŭm anôk čhĭ mnơ̆ng, siêu thị lehanăan sang mnia ti ƀuôn prŏng Ƀuôn Ama Thuôt, čar Dak Lak dưi ƀuh ai êwa hruê Têt mčhĭt m’uăt leh. Lu phung ghan mnia lehahnăn siêu thị bi msiam, rang mdah lu mta mnơ̆ng mkăp kơ mnuih ƀuôn sang hlăm wưng Têt. Dôk ruah blei mnơ̆ng kơ hruê Têt ti êlan Nguyễn Văn Cừ, amai Trần Thảo Nguyên, ti ƀuôn hgŭm Tân Lập, brei thâo:

“Mnơ̆ng Têt thŭn anei mâo lu êdi, ênoh čhĭ djŏ guôp mơh. Têt srăng blei thiăm ƀêñ kĕo, kpiê ƀiêr, êa mmih lehanăn dŭm mta mnơ̆ng mkra êlâi čiăng mđup brei kơ amĭ ama, aduôn aê, amĭ neh prŏng. Gŏ sang kâo ăt blei msĕ yang đar thŭn amâo blei mkăp pioh lu ôh, kyua sang mnia ară anei mâo nanao mnơ̆ng.

Ti sang mnia Tân An, sa hlăm dŭm sang mnia prŏng ti ƀuôn prŏng Ƀuôn Ama Thuôt, phung ghan mnia čhĭ leh mnơ̆ng mkăp kơ hruê Têt mơ̆ng hnưm. Amai Đồng Thị Thanh Trúc, pô čhĭ ƀêñ kĕo, brei thâo, thŭn anei amei mkăp čhĭ mnơ̆ng đĭ 30% mkă hŏng thŭn êlâo lehanăn ba čhĭ mơ̆ng akŏ mlan 12.

Ti dŭm anôk siêu thị lehanăn dŭm anôk čhĭ mnơ̆ng pprŏng mkăn, mnơ̆ng dhơ̆ng mkăp kơ hruê Têt mâo mprăp mơ̆ng hnưm. Hluê hŏng bruă ksiêm dlăng wăl anôk mnia mblei lehanăn hdră duh mkra hlăm thŭn 2024, dŭm êpul êya mđĭ leh bruă mkăp mnơ̆ng ba čhĭ mơ̆ng 30 – 50% mkă hŏng thŭn êlâo. Ayŏng Lê Xuân Hoan, kriê dlăng anôk čhĭ mnơ̆ng prŏng ti Dak Lak brei thâo: êpul mprăp leh mnơ̆ng đĭ êbeh 50% mkă hŏng wưng Têt Giáp Thìn. Mbĭt hŏng bruă mkăp mnơ̆ng lehanăn hdră mtrŭn ênoh čhĭ, thŭn anei, phung čhĭ hliê mđing êdi kơ bruă rơ̆ng hnơ̆ng tŭ jăk mnơ̆ng dhơ̆ng, boh nik leh klei êtak čăt amâo tŭ jăk dưi hmao ƀuh ti dŭm anôk čhĭ mnơ̆ng wưng êgao.

“Dŭm mta mnơ̆ng mkăp pioh rơ̆ng kơ hdră doh êƀăt mnơ̆ng ƀơ̆ng nanao. Mnơ̆ng mkăp pioh čhĭ lu ƀiădah amâo ba jih ti anôk čhĭ ôh, mâo hjiê dưm ti wăl tuh tia mkra mjing Tân An, jih kơh lŏ ba nao.

Čiăng mtrŭt mđĭ hdră blei yua hlăm wưng Têt, dŭm anôk čhĭ mnơ̆ng lŏ pŏk lu hdră mtrŭn ênoh čhĭ jăk găl. Mbĭt anăn, dŭm boh siêu thị ăt mđĭ ênoh mnuih mă bruă lehanăn mđĭ mmông mă bruă, pŏk ƀăng mơ̆ng hnưm lehanăn kđăl ƀăng êla hĭn mkă hŏng yang đar hlăm wang 2 hruê kăm êlâo kơ Têt. Hluê si aduôn Trần Thị Thành Nhân, Kơiăng khua siêu thị Co.opmart Buôn Ma Thuột, hnơ̆ng mnơ̆ng Têt ti siêu thị đĭ mơ̆ng 30 – 50%, hlăm anăn mnơ̆ng Việt Nam mâo truh 90%. Siêu thị ba yua hdră mtrŭn ênoh čhĭ mơ̆ng hruê 1/12/2024 truh kơ hruê 28/1/2025."

 “Êpul êya mkăp leh mnơ̆ng dhơ̆ng hlăm 2 mlan Têt kăp ba čhĭ êbeh 80 êklai prăk, hlăm anăn êpul mnơ̆ng bi hơĭt ênoh čhĭ êbeh 20% lehanăn êpul mđing kơ mnơ̆ng ƀơ̆ng, mnơ̆ng leh mkra mjing, čĭm ŭn, mnŭ, êmô djăp mta, djam mtam, boh kroh, dŭm mta mnơ̆ng yua lu hlăm wưng Têt hŏng ênoh čhĭ hơĭt êlâo, hlăm lehanăn êdei kơ Têt čiăng mkăp kơ klei čiăng blei mprăp mơ̆ng mnuih blei yua.

Čiăng rơ̆ng klei hơĭt kjăp wăl anôk čhĭ mnia hlăm wưng knhal jih thŭn lehanăn Têt djuê ana Ất Tỵ 2025, Anôk bruă sang čư̆ êa čar Dak Lak ba mdah leh Hdră kčah mkp pioh mnơ̆ng dhơ̆ng. Ară anei, 11 anôk bruă duh mkra prŏng mkăp leh mnơ̆ng êbeh 507 êklai prăk, mkăp kơ hlăm brô 36,4% klei čiăng blei yua mơ̆ng mnuih ƀuôn sang. Dŭm mta mnơ̆ng bi hơĭt ênoh chĭ mâo mnơ̆ng ƀơ̆ng, mnơ̆ng leh mkra mjing, čĭm ŭn, mnŭ, êa praĭ, ƀêñ hra, bột ngọt, djam mtam, boh kroh, nhiên liêụ. Hdră bi hơĭt ênoh čhĭ dưi pŏk ngă mơ̆ng hruê 15/12/2024 truh 28/2/2025. Lưu Văn Khôi, Khua knơ̆ng bruă Tuh tia mnia mblei Dak Lak brei thâo, mbĭt hŏng bruă rơ̆ng phŭn mkăp mnơ̆ng, hdră ksiêm dlăng wăl anôk mnia blei hruê Têt ăt mâo dŭm êpul mđing pŏk ngă.

Hmei srăng ksiêm dlăng wăl anôk mnia mblei lehanăn pral ba mdah dŭm hdră msir kñăm rơ̆ng phŭn mkăp hơĭt kjăp, mbĭt anăn mtrŭt dŭm anôk bruă duh mkra mđĭ hĭn hdră ngă bruă, mđĭ kyar wăl anôk mnia mblei, mkăp kơ klei čiăng blei mprăp mơ̆ng mnuih ƀuôn sang.

Hŏng klei mprăp ênŭm kơ mnơ̆ng dhơ̆ng, hdră đru mtrŭn ênoh čhĭ lehanăn rơ̆ng hnơ̆ng tŭ jăk mnơ̆ng dhơ̆ng, wăl anôk mnia mblei wưng Têt djuê ana Ất Tỵ 2025 ti Dak Lak srăng mprăp djăp kơ klei čiăng blei yua mơ̆ng mnuih ƀuôn sang./.