Hơ̆k kdơ̆k, ktưn hưn – anăn jing klei ƀuh mơ̆ng mnuih ƀuôn sang mơ̆ng klei bi mlih hlăm anôk bruă nah gŭ mơ̆ng ala čar hlăm dŭm thŭn giăm anei. Dưi bi mklă: Ka tuôm mâo ôh anôk bruă êlan klông Việt Nam dưi duh bi liê hŏng hnơ̆ng lu, pral msĕ si wưng êgao. Êlan êran pral Dưr – Dhŭng nah Ngŏ ƀrư̆ mjing tur knơ̆ng kơ bruă duh mkra. Kdrŭn ksĭ ti Hải Phòng, ƀuôn prŏng Hồ Chí Minh dưi mkra mđĭ, mjing klei găl kơ bruă ba čhĭ mnơ̆ng kơ ala tač êngao. Dŭm tač êdeh phiơr prŏng dưi duh bi liê, hlăm anăn mâo tač êdeh phiơr prŏng Long Thành – hdră phŭn mơ̆ng ala čar – mâo pŏk ngă mjêč, ƀuăn srăng jing boh kdrŭt đĭ kyar mrâo kơ klei duh mkra nah Dhŭng.

Mbĭt hŏng êlan klông, bruă pui kmlă ăt đĭ kyar. Dŭm hdră pui kmlă êran hŏng ai angĭn, pil yang hruê dưi ba yua. Bruă pui kmlă dưi duh hluê hdră mrâo, mkăp djŏ hŏng klei čiăng đĭ kyar mrô, đĭ kyar mtah. Mđrĭng hŏng anăn, hdră mkŏ mkra ƀuôn prŏng kreh dhar, mrô, anôk bruă hâo hưn êlan kbưi dưi mđĭ pral, mjing tur knơ̆ng kơ bruă knŭk kna mrô, duh mkra mrô, yang ƀuôn mrô.

5 thŭn êgao, duh bi liê knŭk kna mđing kơ anôk bruă nah gŭ truh 80%. Thŭn 2025, hdră duh bi liê knŭk kna mâo 7% GDP. Hlăm klei găl kơ mnuih mă bruă dôk êdu kƀah, ngăn prăk duh bi liê kơ anôk bruă nah gŭ bi mklă leh klei mđing dlăng tal êlâo, čiăng hluê ngă mta kñăm mjing boh kdrŭt mơ̆ng anôk bruă nah gŭ, sa hlăm 3 “boh kdrŭt” phŭn dưi hưn mdah ti Hdră mtrŭn mơ̆ng Đảng.

Klei năng mđing hlăm wưng păn bruă Klei bi kƀĭn tal XIII jing klei bi mlih hlăm klei mĭn duh kơ anôk bruă nah gŭ. Mơ̆ng klei knŏng jưh knang kơ prăk knŭk kna, Việt Nam jhŏng pŏk ƀăng kơ anôk bruă êngao knŭk kna lehanăn hdră duh bi liê mơ̆ng ala tač êngao nao hgŭm. Jing alŭ wăl nao hgŭm hlăm lu hdră nah gŭ phŭn hluê hdră hgŭm knŭk kna – êngao knŭk kna, Phan Hữu Duy Quốc, Knơ̆ng bruă rŭ mdơ̆ng mrô 1, brei thâo:

 Bruă rŭ mdơ̆ng, hŏng dŭm kdrăp mrâo dleh, dŭm hdră dleh, dŭm hdră prŏng mơ̆ng Việt Nam amâo dah kban găn êa ksĭ prŏng, anôk bruă duh mkra dưi ngă leh jih. Klei đĭ kyar jăk lehanăn mprăp tŭ ngă dŭm bruă klam prŏng mrâo.

Boh sĭt mơ̆ng dŭm hdră bruă phŭn ala čar hlăm wưng êgao jing klei bi mklă jăk kơ hnơ̆ng trah dlăng mơ̆ng Đảng kơ hdră mđĭ kyar anôk bruă nah hgŭ bi knar, mđrăm mbĭt, mrâo mrang, mâo klei bi hgŭm krĭng. Nai prĭn Nguyễn Phương Bắc – Khua hđăp Knơ̆ng ksiêm hriăm mđĭ kyar bruă duh mkra – ala ƀuôn čar Bắc Ninh, mblang:

  Duh bi liê knŭk kna wưng anei mđing kơ dŭm bruă prŏng mlir krĭng, pŏk mlar wăl anôk đĭ kyar. Bắc Ninh- Bắc Giang leh 2 čar bi mŭt mbĭt snăn hluê hŏng sa tur knơ̆ng jing klei bi mguôp mơ̆ng dŭm krĭng čư̆ čhiăng kwar Dưr lehanăn krĭng dap mnai krông Hồng.

Mŭt hlăm wưng êgao, klei čih mkra Hră hâo mdah bruă kđi čar ba mdah kơ Klei bi kƀĭn tal XIV lŏ dơ̆ng mñă: Mjing boh kdrŭt anôk bruă nah gŭ jing sa hlăm dŭm boh kdrŭt phŭn mơ̆ng klei đĭ kyar ala čar. Mơ̆ng klei mĭn čuăl mkă truh kơ hdră êlan phŭn, mă wăl anôk đĭ kyar jing bruă phŭn, mđĭ klei bi hgŭm krĭng, mlir anôk bruă. Mta kñăm amâo djŏ knŏng mkŏ mkra lu hdră mă bruă ƀiădah jing sa wăl anôk lăn êa mrâo mrang, kreh dhar, mtah lehanăn hơĭt kjăp, mơ̆ng anăn mđĭ ai bi ktưn ala čar, mđĭ kơhưm mơ̆ng Việt Nam hlăm boh tŭ yuôm krĭng lehanăn tar rŏng lăn.

Pô thơ̆ng kơ bruă duh mkra, nai prŏng, nai prĭn Hoàng Văn Cường- Khua hlăm Dhar bruă Ngăn prăk bruă kƀĭn ala bi mklă, bi mlih klei mĭn hlăm hdră jak iêu klei duh bi liê hlăm anôk bruă nah gŭ dưi bi êdah klă hlăm dŭm hdră phŭn dưi rŭ mdơ̆ng mđrăm mbĭt hlăm thŭn anei.

Êlâo adih drei knŏng jak iêu hdră duh hlăm anôk bruă êlan klông, ƀiădah ară anei drei ƀuh klei tŭ dưn dưi mđĭt lar hlăm djăp mta bruă. Kyua anăn, brei drei pŏk mlar hdră bi hgŭm duh bi liê knŭk kna – êngao knŭk kna hlăm bruă mdrao mgŭn, mtô bi hriăm, dhar kreh, mjuăt ktang asei mlei čiăng mjing boh kdrĭt đĭ kyar.

Lŏ dlăng wưng păn bruă Klei bi kƀĭn tal 13, dưi ƀuh ktuê êlan đĭ kyar anôk bruă nah gŭ mjing leh tur knơ̆ng kjăp kơ klei đĭ kyar mrâo. Grăp ktuê êlan êran pral, tač êdeh phiơr, kdrŭn ksĭ dưi pŏk mlar, ƀuôn prŏng kreh dhar dưi mkŏ mjing… hlăk lehanăn dôk mjing klei bi sĭt kơ klei čang hmăng kơ sa Việt Nam đĭ kyar pral, hơĭt kjăp. Anei jing knhuang nao đĭ kyar, mjing tur čiăng kơ ala čar mŭt hlăm ktuê êlan đĭ kyar, mdrŏng sah hlăm dŭm thŭn ti anăp./.