Ti să Êa Knuêč, čar Dak Lak, gưl tal êlâo mnuih ƀuôn sang ƀuh Khua bruă Đảng să livestream čhĭ boh durian. Mniê khua bruă Đảng amâo djŏ knŏng kƀăt siam, ƀiădah lŏ jĕ giăm hŏng mnuih ƀuôn sang kyua knhuah blŭ jăk ênang hŏng mnuih ƀuôn sang hŏng klei Êđê mtam.

Klei sa čô khua kiă kriê să pô mtam nao hlăm hdră ba čhĭ mnơ̆ng lŏ hma mbĭt hŏng ƀĭng ngă lŏ hma ba leh sa asăp hưn mthâo bruă kđi čar prŏng: Bruă knŭk kna mrâo amâo djŏ knŏng ba mdah “hdră mtrŭn”, ƀiădah lŏ hrăm mbĭt hŏng hdră ngă bruă. Khua bruă Đảng să Ngô Thị Minh Trinh dôk ti anăp kdrăp mdar rup, mbĭt hŏng mnuih ƀuôn sang hưn mthâo kơ boh durian, mblang kơ hdră pla, mkra lehanăn kuôl kă jao brei mnơ̆ng. Ti djiêu jing mduôn 70 thŭn, gưl tal êlâo djă micro livestream, ktưn hưn yăl dliê klei mơak hlăk mâo bruă knŭk kna alŭ wăl đru ba čhĭ mnơ̆ng. Jih mmông mđung anei mâo dŭm êbâo gưl dlăng, dŭm êtuh klei kuôl kă blei mnơ̆ng lehanăn yuôm bhăn hĭn jing hdră mĭn mrâo, hdră kriê dlăng mrâo dưi čih yap. Khua êpul hgŭm bruă lŏ hma doh Krông Pač, Mai Đình Thọ – bi mni kơ hdră ngă anei.

“Sa čô khua bruă Đảng thâo kơ bruă, jĕ giăm, klă sĭt hrăm mbĭt hŏng mnuih ƀuôn sang. Anei jing sa klei bi mlih klă, mơ̆ng klei gĭt gai truh kơ hdră hrăm mbĭt.

Mnuih ƀuôn sang krĭng Dhŭng kwar krah – Lăn dap kngư đăo knang bruă knŭk kna alŭ wăl 2 gưl mrâo amâo djŏ knŏng ngă sa bruă, ƀiădah mâo lu bruă, lu mta mlih mrâo, ƀuh klă klei bi mlih klă klơ̆ng hlăm klei dôk mâo sĭt.

Ti să Ia Băng lehanăn Mang Yang (čar Gia Lai), bruă knŭk kna gưl să mâo “Jao klei dưi” nao hgŭm hlăm hdră čiu hnô, msir mghaih anôk ala kơ hdră êlan êran pral Quy Nhơn – Pleiku. Sa hdră bruă mâo ênoh êbeh 43.700 êklai prăk, nao găn 17 să, hmăi truh kơ êbeh 3.000 gŏ sang, bruă anei jing bruă gưl čar. Ƀiădah gưl anei, să čŏng mkŏ mjing klei bi kƀĭn ƀuôn, mđing hmư̆ klei blŭ, bi hgŭm hŏng êpul đru kčĕ čiăng pơ̆ng gơ̆ng knăl knông lăn, ksiêm dlăng grăp km lăn, grăp gŏ sang mkŏ anôk dôk mrâo. Khua anôk bruă sang čư̆ êa să Mang Yang –  Võ Lê Xuân Thiện – brei thâo:

“Hmei mâo leh lăn mkŏ anôk dôk mrâo giăm êlan. Leh să nao hgŭm ngă bruă, klei mtrŭt mjhar mnuih ƀuôn sang ênưih hĭn kyua mnuih ƀuôn sang đăo knang kơ mnuih hlăm să pô hĭn mkă hŏng mnuih hriê mơ̆ng anôk mkăn”.

Klei mĭn “Giăm mnuih ƀuôn sang čiăng kơ mnuih ƀuôn sang đăo knang, kyua mnuih ƀuôn sang čiăng kơ mnuih ƀuôn sang sa ai” dưi bi êdah hluê hŏng bruă knŭk kna gưl să mđing hgŭm mbĭt mơ̆ng tal êlâo mtam, pral ruh mtlaih klei dleh mơ̆ng mnuih ƀuôn sang. Lê Thị Liên, mnuih ƀuôn sang ti alŭ 3, să Êa Bung, čar Dak Lak brei thâo: Dŭm gŏ sang  hlăm alŭ bi kuan klei kơ mbông mnuôr êa hlăm dŭm thŭn êgao, ngă truh boh klei mâo êa ƀiădah mdiê kăn djăp êa lei. Ƀiădah leh bruă knŭk kna să mrâo mŭt ngă bruă, nao truh ti alŭ mđing hmư̆, klei amâo thâo bi djŏ anei pral dưei msir mghaih hlăm sa hruê.

“Phung khua să ăt hur har, jih ai tiê, giăm mnuih ƀuôn sang, lač jăk kơ phung khua să đru leh, dăp hdră jăk găl, ară anei jăk leh, êa yua mâo ênŭm leh.

Hlăk gưl să bi êdah ai tiê giăm mnuih ƀuôn sang, bruă knŭk kna gưl čar ăt bi êdah ai tiê hrăm mbĭt, bi sĭt klei gĭr bruă kđi čar. Ti Gia Lai, hlăm mlan tal êlâo leh bi mŭt mbĭt lehanăn ngă bruă hluê gru hmô bruă knŭk kna alŭ wăl 2 gưl ba mdah leh dŭm hdră yuôm bhăn, mtrŭt mđĭ hdră msir mghaih anôk ala mkăp kơ hdră êlan êran pral, mkŏ mkra ƀăng jang knông lăn Lệ Thanh jing “Ƀăng jang knông lăn kreh knhâo, mrâo mrang, ngă bruă 24/7” lehanăn mtă brei mđĭ kyar hdră knơ̆ng kdơ̆ng êa mâo ênoh 17.000 êklai prăk. Khua bruă Đảng čar Gia Lai, Hồ Quốc Dũng mñă:

 “Brei mjêč ba mdah hdră jăk găl čiăng pŏk ngă pral krĭng krih êa. Knuă druh bruă lŏ hma brei hnưm ba mdah hdră ngă bruă klă klơ̆ng. Klei tĭng dlăng kluôm tal êlâo brei ƀuh, tơdah duh bi liê ti krĭng Gia Lai hđăp, čiăng rơ̆ng                                djăp krĭng krih prŏng, brei duh truh hlăm brô 17.000 êklai prăk ƀiădah brei kah mbha hdră duh bi liê hluê wưng. Êngao phŭn mkăp prăk mơ̆ng Gưl dlông, Gia Lai srăng nao hgŭm hlăm bruă mkăp prăk, mbĭt anăn brei tĭng kơ hdră mkŏ mjing 1 hdră bruă mrâo čiăng čan prăk ODA. Tơdah hlăm wang 5 thŭn ti anăp, Gia Lai amâo msir mghaih klei krih êa kơ dŭm krĭng dôk kƀah êa, anei klă sĭt amâo bi leh bruă klam hŏng mnuih ƀuôn sang.

Leh bi mŭt hŏng čar Dak Nông lehanăn Bình Thuận, Lâm Đồng jing čar prŏng êdi mơ̆ng kluôm ala, mâo klei jăk găl mơ̆ng kluôm krĭng ƀiădah ăt mâo lu klei dleh kpăk. Dŭm hdră êlan klông, mnơ̆ng yuôm hlăm gŭ lăn, klei kpăk gun mơ̆ng lu thŭn, giăm 100 să kƀah knuă druh thơ̆ng hlăm lu mta bruă. Čiăng msir mghaih klei anei, čar ba nao leh dŭm êtuh čô knuă druh mơ̆ng gưl čar truh kơ să, mđing djăp klei găl mâo čiăng ruh mtlaih klei gun kpăk ti dŭm hdră bruă. Lê Trọng Yên, kơiăng khua anôk bruă sang čư̆ êa čar mñă, brei jhŏng mĭn, jhŏng ngă, jhŏng đua klam.

 “Hluê hŏng hdră ba mdah mơ̆ng phung duh bi liê, čan prăk êlâo čiăng hluê ngă hdră msir mghaih dŭm klei kpăk gun, brei Knơ̆ng bruă Ngăn prăk gĭt gai lehanăn dŭm êpul bruă djŏ tuôm đru kčĕ, mkŏ mjing klei bi kƀĭn čiăng trĭng dlăng nik. Hluê ngă djŏ hdră bhiăn, rơ̆ng klei khuăt, hnưm ba jao kơ phung duh bi liê čiăng pŏk ngă bruă. Snăn kơh dưi ruh mtlaih, bi knŏng hluê ngă hluê hdră duh bi liê knŭk kna – êngao knŭk kna wưng thŭn 2025-2030 dleh êdi, amâo dưi mkăp djŏ hŏng klei čiăng mơ̆ng hdră bruă.

Gru hmô bruă knŭk kna 2 gưl ti Lăn dap kngư dôk hlăm wưng “Pui bi lông hŏng mah”. Bruă pŏk ngă hdră mtrŭn ti wưng anei tuôm hŏng lu klei dleh dlan. Khă snăn, dŭm bruă ngă kjăp čiăng găn hgao jih klei anăn, srăng lui lu gru kruăk. Bruă knŭk kna gưl să gĭr dôk giăm mnuih ƀuôn sang hĭn. Bruă knŭk kna gưl čar amâo mdei tui duah hdră msir kơ dŭm klei anei. Klei bi mguôp mơ̆ng anôk bruă knŭk kna dưi hluê ngă kjăp hŏng ai tiê “Amâo mă bruă jih mmông ôh ƀiădah mă truh kơ jih bruă” – dôk mjing boh kdrŭt đĭ kyar kơ krĭng Lăn dap kngư hlăm wưng mrâo./.