Hlăm dŭm hruê êgao, dŭm Anôk bruă knŭk kna ti čar Lâm Đồng tŭ mă leh dŭm pluh êbâo hră mơar, leh anăn msir mgaih leh êbeh 97% hră mơar, dôk tal 7 kluôm ala kơ klei msir mgaih hră mơar knŭk kna. Čiăng kơ mnuih ƀuôn sang lŏ dơ̆ng msir mgaih hră mơar djŏ wưng, găn ênưih, Knơ̆ng bruă sang čư̆ êa čar Lâm Đồng mkŏ mjing klei hriăm mjuăt, mă klei thâo kơ êbeh 5000 čô knuă druh mă bruă ti dŭm Anôk bruă knŭk kna gưl să; msir mgaih pral klei gun kpăk hră mơar kơ lăn ala kyua kƀah mrô; msir mgaih klei dleh dlan kơ êlan mđung ênoh  mrô; mkŏ mjing 3 Êpul mă bruă mơ̆ng čar nao mă bruă, đru kơ dŭm alŭ wăl ruh mgaih klei dleh dlan, gun kpăk, hmao pŏk ngă dŭm bruă klam phŭn…

Hồ Văn Mười,  Khua Knơ̆ng bruă sang čư̆ êa čar Lâm Đồng, brei thâo, čar dôk lŏ dơ̆ng ngă jăk bruă kơ knuă druh čiăng kơ êpul mă bruă knŭk kna 2 gưl ngă bruă tŭ dưn:

 “Găl ênưih klă klơ̆ng jing knuă druh thâo săng kơ bruă ba yua knŭk kna 2 gưl mơ̆ng gưl čar truh să, ƀuôn hgŭm, wăl klă mngač, đua klam kyua anăn găn leh lu klei dleh dlan. Hmei lŏ dơ̆ng mtă kơ phung knuă druh. Msĕ si mâo ƀuôn hgŭm mâo 2,3 čô mbruă kơ klei kreh knhâo kdrăp mrâo ƀiădah mâo ƀuôn hgŭm amâo mâo ôh. Mâo ƀuôn hgŭm ară anei knuă druh bruă hdră bhiăn amâo mâo ôh hlei pô amâodah mâo ƀiădah amâo mbruă ôh, ka tuôm ngă. Leh anăn dŭm bruă kơ lăn ala, hlăm ai tiê anăn srăng dăp knuă druh bi knar 124 anôk bruă să, ƀuôn hgŭm”

Hŏng êbeh 5000 čô knuă druh mă bruă ti dŭm Anôk bruă knŭk kna gưl să, čar Lâm Đồng ba nao 1.200 čô êdam êra ti 124 anôk bruă knŭk kna să, ƀuôn hgŭm ti čar čiăng đru kơ bruă sang čư̆ êa nah gŭ ngă bruă klam knŭk kna leh anăn mlih mrô. Phung êdam êra čŏng ngă bruă ktrâo lač kơ mnuih ƀuôn sang mrô, dưm kdrăp bi mklă anăn điện tử… Mbĭt anăn, đru kčĕ, mblang leh anăn đru kơ klei hâo hưn čiăng êdi kơ hră mơar knŭk kna, hdră bruă online.

 Hlue si Bùi Quốc Huân, Khua Knơ̆ng bruă sang čư̆ êa să Lạc Dương, čar Lâm Đồng, anei jing bruă ngă yuôm bhăn, klă sĭt, đru mđĭ bruă ngă dŭm Anôk bruă knŭk kna ngă bruă găl ênưih, bi hrŏ hruê mmông hlăm klei tŭ mă leh anăn msir mgaih hră mơar, boh nik hŏng dŭm krĭng taih  kbưi, krĭng mnuih djuê ƀiă adôk lu klei kƀah hlăm klei ba yua kdrăp mrô hlăm đĭng blŭ thâo mĭn. Bùi Quốc Huân, brei thâo:

      Tơdah mnuh ƀuôn sang nao ngă hră mơar, hlăm bruă hlue ngă hlăm điện tử ka mưng snăn mâo êpul êdam êra anei đru. Kâo ăt gĭt gai leh êpul kahan ksiêm să bi hgŭm đru kơ mnuih ƀuôn sang jăk hĭn, hlei pô ka ngă hlăm VneID snăn mtô kơ digơ̆. Mbĭt anăn, lŏ ksiêm dlăng ênoh mnuih ƀuôn sang yua đĭng blŭ thâo mĭn čiăng mơ̆ng anăn kčĕ hdră msir. Yuôm bhăn hĭn jing tơdah mâo mnuih ƀuôn sang nao akâo mkăp hdră bruă knŭk kna snăn hmei srăng đru kơ 100%.