Dŭm hruê anei, ktuê dŭm bĭt êlan ti An Nhơn Bắc, ênưih sơnăk dưi ƀuh mnuih ƀuôn sang bi dlăng kriê, pleh hla sŭng gơr. Anei jing wưng yuôm bhăn, bi klă mmông blang mnga leh anăn ênoh yuôm ana sŭng gơr hlăm wưng tết. Ayŏng Ngô Văn Hào, alŭ Trung Lý, ƀuôn hgŭm An Nhơn Bắc, pô mâo êbeh 15 thŭn ngă bruă pla ana sŭng gơr brei thâo, gŏ sang ñu ară anei mâo êbeh 3.000 phŭn ana sŭng gơr dŭm mta, lu jing sŭng gơr giáng long, sŭng gơr grep leh anăn sŭng gơr bonsai.

Wưng anei dŭm anôk pla mjing lŏ dăp phŭn kyâo, ruah dŭm phŭn djăp hnơ̆ng jăk lŏ dăp hĕ, ti phŭn ka djăp lui kơ thŭn êdei, ară anei mnuih ƀuôn sang bi ba leh ana sŭng gơr ti alŭ wăl jŭm dar Bruă sang čư̆ êa ƀuôn hgŭm mâo klei čuăl mkă čiăng čhĭ kơ phung hrui blei. Ară anei phung pla mjing dôk mlih hbŭ kơ ana sŭng gơr leh anăn kriê dlăng bi msiam, kyuanăn dôk ngă mjêč êdi”.

Ăt hlăm klei mă bruă mjêč, Ngô Minh Trí, ti alŭ Trung Lý, ƀuôn hgŭm An Nhơn Bắc mâo 2000 phŭn ana sŭng gơr prŏng leh anăn điêt, mĭn tĭng ba čhĭ 60 phŭn hlăm wưng tết anei. Ñu brei thâo, leh gưl êa lêč, bruă kriê dlăng ana sŭng gơr dleh hĭn, ƀiădah kyua yan adiê găl, ana lŏ wĭt čăt đĭ. Hluê si ñu, dŭm thŭn giăm anei, klei bi hlăm sŭng gơr bonsai dưi mâo klei khăp hĭn kyua khuăt, ênưih rang mdah.

“Ară anei dôk bi msiam leh anăn pleh hla, pô čhĭ mơ̆ng 500.000 truh kơ 1 êklăk prăk 1 phŭn. Bonsai điêt pŭ ênưih dưi dưm dlông jhưng mă bruă, sŭng gơr mâo lu mta ƀiadah ară anei bonsai jing arăng khăp hĭn. Mkra ana anei mơ̆ng sŭng gơr giáng long amâodah sŭng gơr lùm leh anăn khăt djŏ hdră mnêč luč dŭm thŭn kơh mâo sŭng gơr bonsai”.

Êjai anăn, hŏng dŭm đang pla mjing sui thŭn, klei mlih mơ̆ng klei čiăng ăt bi mâo lu klei kpăk. Lê Văn Tuấn, ƀuôn hgŭm An Nhơn Bắc, pô mâo êbeh 40 thŭn pla ana Sŭng gơr, ară anei  mâo hlăm brô 500 phŭn sŭng gơr giáng long, hlăm anăn mâo lu phŭn êbeh leh 10 thŭn.

Ana sŭng gơr ti anôk mnia mblei ară anei jơr hĭn hŏng êlâo, êlâo dih giáng lŏng knŏng ƀiă, ară anei ñu jing lu hĭn. Êlâo dih amâo mâo mnơ̆ng čhĭ ôh ară anei lu kyuanăn klei ba čhĭ êmưt hĭn. Sŭng gơr kâo pla 30 thŭn mâo 30 thŭn mrâo. Bi mrâo hĭn ăt mâo 6 thŭn, ară anei bi mlih amâo dưi ôh, thŭn mduôn leh mkra ana bonsai ya hlŏng ba čhĭ yơh deh”.

Ƀuôn hgŭm An Nhơn Bắc, čar Gia Lai dưi mkŏ mjing hŏng klei bi mŭt dŭm ƀuôn hgŭm, să mơ̆ng wăl krah An Nhơn, čar Bình Định hđăp, ară anei jing čar Gia Lai. Anei dưi dlăng jing krĭng pla sŭng gơr prŏng leh anăn hing ang mơ̆ng kwar krah, hŏng êbeh 450 gŏ sang leh anăn ênhă pla mjing êbeh 145ha, ba wĭt hnư prăk êbeh 100 êklai prăk grăp thŭn.

Angĭn êbŭ mrô 13 (mlan 11/2025) mbĭt hŏng klei êa lêč ngă truh klei hmăi kjham kơ lu krĭng pla sŭng gơr ti Gia Lai, hlăm anăn mâo ƀuôn hgŭm An Nhơn Bắc. Êa lêč bi êngăp lu đang pla sŭng gơr, knŏng lui mă dŭm phŭn bŏ hŏng lŭ, agha tloh, dhar joh. Ƀiădah, leh êa hrŏ, phung pla sŭng gơr tinei lŏ pral wĭt hŏng bruă mkra mjingh. Grăp đang pla sŭng gơr dưi wĭt mkra lăn, khăt hĕ adha joh. Ară anei dŭm phŭn sŭng gơr lŏ bi mtah, mnga buk, drông yan mnga mrâo leh anăn ba mbĭt klei hmăng hmưi kơ sa tết kluôm dhuôm.

Đinh Thanh Trình, k’iăng khua Bruă sang čư̆ êa ƀuôn hgŭm An Nhơn Bắc, brei thâo, klei truh yan adiê thŭn êgao ngă kơ hlăm brô 120.000 ana sŭng gơr hmăi djŏ, luč liê hlăm brô êbeh 80 êklai prăk. Ti anăp boh sĭt anăn, Bruă sang čư̆ êa alŭ wăl ngă leh lu hdră êlan đru kơ mnuih ƀuôn sang krŭ wĭt klei ngă bruă:

“Čiăng mkŏ mjing kleoi găl kơ mnuih ƀuôn sang mkra mjing leh anăn čhĭ ana sŭng gơr hlăm wưng tết, anôk bruă ngă lu hdră êlan, hlăm anăn lui prăk jia anôk mkăm čhĭ, mkŏ mjing klei găl mbha êlan êdeh mơ̆ng dŭm čar Dhŭng- Dưr hriê blei, mkŏ mjing klei găl kơ phung tuê hriê blei. Mbĭt anăn mâo dŭm hdră êlan hưn mdah hŏng gưl bruă kơ dlông, knơ̆ng prăk brei čan prăk mnga hdjul čiăng kơ mnuih ƀuôn sang mâo klei găl leh anăn ênoh prăk lŏ wĭt mkra mjing”.

Ti krah đang sŭng gơr dôk mŭt hlăm yan, ênai ktrei khăt adhan, ênai êa krih mbĭt hŏng mđiă lĕ tlam mkŏ mjing ai êwa mă bruă hơ̆k mơak, bŏ hŏng klei hmăng hmưi. Hŏng phung pla sŭng gơr An Nhơn Bắc, wưng sŭng gơr Tết Bính Ngọ 2026 amâo djŏ knŏng jing yan mnia mblei, ƀiădah lŏ bi klă kơ klei hơĭt kjăp, klei gĭr găn klei dleh dlan, čiăng kơ grăp knuh mnga sŭng gơr ba mbĭt sa yan mnga mrâo hŏng lu klei hmăng hmưi./.