Êlan dơ̆ng pral Quy Nhơn – Pleiku mâo boh taih hlăm brô 125km, mâo 4 grông êlan êdeh, ênoh duh bi liê êbeh 43.700 êklai prăk leh anăn dưi mbha jing 3 hdră kdrêč. Hlăm anăn, hdră kdrêč tal 3 mâo boh taih hlăm brô 35km, mơ̆ng km 90 - km 124, hŏng ênoh duh bi liê êbeh 9.100 êklai prăk. Êlan găn alŭ wăl 6 să, ƀuôn hgŭm Lơ Pang, Mang Yang, K’Dang, Đak Đoa, Ia Băng leh anăn Hội Phú, mĭn tĭng bi leh hlăm thŭn 2029.

Blŭ hrăm hlăm knăm, Phạm Anh Tuấn-  khua Bruă sang čư̆ êa čar Gia Lai brei thâo, êlan dơ̆ng mrô 19 jing êlan dơ̆ng phŭn mkŏ Ngŏ - Yŭ mơ̆ng čar Gia Lai leh mkŏ dăp, leh bi mŭt anôk bruă Knŭk kna, ƀiădah ăt adôk mâo lu kčŭn čư̆ mdêč mdar, ƀô̆ êlan điêt, aram aram luč klei êđăp ênang hlăm êlan klông, jing leh klei kpăk prŏng hŏng klei mđĭ kyar bruă duh mkra ala ƀuôn mơ̆ng čar. Leh mkra êlan anei, srăng dưi bi hrŏ mmông êrô êbat, bi hrŏ ênoh bi liê kơ klei dŭ mdiăng, mđĭ klei mkŏ krĭng, mkŏ mjing êlan dơ̆ng mkŏ Ngŏ -  Yŭ, mkŏ hŏng êlan dơ̆ng pral Dưr -Dhŭng, tač êdeh phiơr, kdrŭn ksĭ leh anăn ƀăng jang knông lăn Lệ Thanh, hluê anăn mtrŭt mđĭ klei đĭ kyar bruă duh mkra - ala ƀuôn leh anăn mđĭ hnơ̆ng klei hdĭp mnuih ƀuôn sang. Čar Gia Lai mñă kơ phung ngă bruă srăng ngă bruă rơ̆ng kơ hnơ̆ng jăk hŏng dŭm hdră, čiăng dưi mâo mta kñăm lŏ kiă kriê hlăm 5 thŭn.