Knăm mơak hră klei mrâo yan mnga Ất Tỵ čar Kon Tum thŭn 2025 mâo rang mdah êbeh 100 mta hdruôm hră lač kơ yan mnga mơ̆ng dŭm anôk bruă klei mrâo hlăm čar lehanăn êngao čar. Lu mta hră klei mrâo mâo klei bi êdah lu kơ klei mlih mrâo, klei kpưn đĭ kơ lăn čar, lehanăn čang hmăng kơ bruă mlih mrô hlăm bruă klei mrâo. Mbĭt hŏng lu mta hră klei mrâo mâo čih, anôk rang mdah lehanăn anôk dlăng hră mâo dăp jăk siam jiă knhuah gru yan mnga, mđĭ ai mnuih nao dlăng hlăm wưng Tết.

Pô ngă bruă klei mrâo, pô čih klei yăl dliê Lê Văn Thiềng, hlăm êpul hgŭm bruă klei mrâo mnuih khua thŭn, Êpyl hgŭm bruă klei mrâo čar Kon Tum, lač: “Dŭm mta hră klei mrâo ba rang mdah mâo čih lu kơ klei mlih mrâo, hư̆n mthâo kơ klei Đảng, knŭk kna kiă kriê boh nik mơ̆ng khua gĭt gai Đảng Tô Lâm. Jih jang bi sa ai hŏng hdră êlan mơ̆ng Đảng. Hlăm klei rang mdah siam, jiă knhuah gru dhar kreh djuê ana lehanăn bi mguôp hŏng ênuk mrâo mrang klei bi mlih mrô”.Ti knăm pŏk hră klei mrâo yan mnga Ất Tỵ thŭn 2025, Êpul hgŭm bruă klei mrâo čar Kon Tum mđup brei leh kơ knơ̆ng kiă kriê kahan răng mgang knông lăn dŭm mta hră čih kơ yan mnga pioh mơĭt kơ knuă druh lĭng kahan ti knông lăn./.