Mă hnư mnơ̆ng tết mâo 500 êbâo prăk mơ̆ng hdră Yan mnga klei khăp mơ̆ng Êpul gru bi kal hrah čar Dak Lak bi mguôp hŏng dŭm anôk bruă mkŏ mjing, H’Wêñ Ƀuôn Yă, ti ƀuôn Kroa B, să Čuôr Dăng, kdriêk Čư̆ Mgar hơ̆k mơak.

   “Kâo srăng yua prăk anei blei braih, hơ̆k mơak êdi, kyua grăp hruê hiu duñ djah ăt suăi êmăn ƀiădah kăn mâo prăk lu lei. Ară anei mâo klei uêñ mĭn jing yuôm bhăn êdi, mâo kleiđru kâo hơ̆k mơak êdi”.

Čiăng hmao mâo klei đru, mđĭ ai mnuih ƀun ƀin, gŏ sang dleh dlan mâo klei găl drông yan mnga ênŭm ênap hĭn, Êpul gru bi kal hrah čar Dak Lak bi mguôp hŏng dŭm anôk bruă mđup brei dŭm êtuh hnư mnơ̆ng ti dŭm alŭ wăl krĭng dleh dlan, krĭng mnuih djuê ƀiă. Mbĭt hŏng bruă kriê dlăng tết, Êpul ăt ngă dŭm mta bruă bi hơĭt klei hdĭp yang ƀuôn msĕ si: mkă dlăng kƀông ƀăng êgei, mđup brei hră ênua bruă mdrao mgŭn, mđup brei klei đru hriăm hră mơar leh anăn êdeh wai jơ̆ng kơ phung hđeh sang hră dleh dlan hriăm thâo…

Mbĭt anăn, dŭm êpul bruă êdam êra, bruă phung mniê, êpul hgŭm mnuih mă bruă…ăt mkŏ mjing lu mta bruă kriê dlăng Tết kơ mnuih ƀuôn sang krĭng dleh dlan, krĭng knông lăn. Aduôn Võ Thị Ngọc, k’iăng khua kiă kriê êpul bruă phung mniê čar Dak Lak brei thâo.

      “Hŏng êpul bruă phung mniê čar ăt mkŏ mjing mđup brei hnư mnơ̆ng kơ phung dleh dlan hŏng hŏng ênoh 500 êklăk prăk, mkŏ mjing hdră tết klei khăp ti kdriêk Krông Ƀŭk; Hrăm mbĭt hŏng phung mniê krĭng knông lăn, mkŏ mjing dŭm mta bruă mđing kơ phung mniê leh anăn phung hđeh ƀun ƀin ti krĭng knông lăn Ia Lôp leh anăn Ea Êbung. Hlăm wưng kơ anăp srăng lŏ dơ̆ng ngă dŭm mta bruă ti nha gŭ leh anăn dŭm alŭ wăl dleh dlan”.

Truh kơ wưng anei, ti čar Dak Lak mâo leh êbeh 55.200 gŏ sang mâo hnư mnơ̆ng tết hŏng ênoh jih jang truh 25 êklai prăk. Hluê si Nông Thị Thu, k’iăng khua dhar bruă mặt trận čar Dak Lak, čar rơ̆ng kơ jih jang dŭm gŏ sang ƀun, giăm ƀun dưi mâo hnư mnơ̆ng, mâo klei găl drông yan mnga, drông Tết hluê si hdră êlan “Amâo mâo lui kơ hlei pô kơ tluôn”.

       "Mkăp brei 1.550 hnư mnơ̆ng hŏng ênoh grăp hnư 500.000 prăk mơ̆ng keh prăk kyua mnuih ƀun ƀin čar. Mbĭt anăn, bi mguôp kjăp hŏng dŭm êpul hgŭm mơ̆ngmặt trận, hluê ngă dŭm mta bruă kriê dlăng tết kơ phung ƀun ƀin ăt msĕ mơh bi mguôp hŏng bruă Mặt trận leh anăn dŭm anôk bruă, alŭ wăl mkŏ mjing dŭm mta bruă ƀri wưng Tết Nguyên Đán Ất Tỵ thŭn 2025.”

Dŭm hruê anei, Hdră “Tết kkuh kŭm –Yan mnga hdơr kơ Đảng” leh anăn Knăm mnia mblei tết Công đoàn thŭn 2025 ti čar Dak Lak ăt dưi mkŏ mjing hŏng lu mta bruă tŭ dưn bi mđao ai tiê mnuih. Hlăm hdră, Êpul mkŏ mjing mđup brei 400 hnư mnơ̆ng kơ phung đoàn viên, mnuih mă bruă, mâo ênoh êbeh 800.000 prăk hlăm sa hnư, đru ngăn prăk rŭ mdơ̆ng 11 boh sang “Hơuh mđao công đoàn” hŏng ênoh 550 êklăk prăk. Mâo mă sang dôk hơuh mđao công đoàn wưng anei, amai H’Ben Mlô, naoi mtô ti sang hră hđeh điêt Ea H’Đĭng, kdriêk Čư̆ Mgar brei thâo:

Hruê anei kâo hơ̆k mơak êdi êjai dưi mbĭt hŏng dŭm anôk bruă đru kơ hmei dưi ngă sang hơuh mđao công đoàn thŭn 2025. Kâo mĭn tĭng akŏ mlan 3 srăng mphŭn rŭ mdơ̆ng sang. kâo ƀuh hơ̆k mơak êdi.”

Hdră “Knăm mnia mblei công đoàn 2025” ti čar Dak Lak mkŏ mjing hŏng klei nao hgŭm mơ̆ng 50 anôk bruă, knơ̆ng bruă. Hŏng ênoh dŭm mta mnơ̆ng čiăng êdi giăm 1 êklai prăk, tinei mkŏ mjing lu mta bruă msĕ si brei hră blei mnơ̆ng amâo mâo liê prăk, mkă dlăng klei ruă, hlăk mblang hdră bhiăn leh anăn dŭm hdră hlăp lêñ kơ phung đoàn viên, mnuih mă bruă. Mrâo blei mnơ̆ng yua djŏ ai hlăm wưng tết, amai Tống Thị Thu Thoi, knơ̆ng bruă kđăm mkra čar Dak Lak brei thâo:

Jih jang phung amai adei nao hlăm sang mnia công đoàn 2025, hrei tinei ƀuh mâo lu mta mnơ̆ng dhơ̆ng. Hriê tinei ăt mâo lu mta mnơ̆ng ênoh êlưih, công đoàn ăt brei dŭm pŏk hră blei mnơ̆ng, mlih mnơ̆ng. Mâo lu klei đru êdi, lu hnư mnơ̆ng kơ phung mă bruă nao hgŭm.”

Dưi thâo, wưng Tết Nguyên đán Ất Tỵ thŭn anei, čar Dak Lak bi liê êbeh 75 êklai prăk  čiăng nao čuă, mđup brei hnư mnơ̆ng kơ phung knŭk kna dlăng ba leh anăn mnuih mă bruă. Mbĭt hŏng anăn, 138 anôk bruă lĭng kahan, kahan ksiêm, bruă dliê srăng mă hnư mnơ̆ng mâo ênoh mơ̆ng 3 – 7 êklăk prăk. Khua gĭt gai čar srăng nao čuă leh anăn mđup brei 54 hnư mnơ̆ng tết kơ phung mâo ai đru êdah êdi leh anăn dŭm anôk bruă hlăm alŭ wăl./.