H’Dit Buôn Yă, ti ƀuôn Dhă Prŏng, ƀuôn hgŭm Ƀuôn Ama Thuôt, čar Dak Lak hơ̆k mơak brei thâo, ñu ư ai êdai êjai nao mkă dlăng klei ruă knŏng ba mă đĭng blŭ mâo VNEID:

“Mơ̆ng hruê yua Vneid nao sang êa drao amâo guôn ba hră ênua mdrao mgŭn ôh, ƀiădah mâo leh hlăm đĭng blŭ, ƀuh găl êdi”.

Hlue si klei tĭng mkă, hlăm thŭn anei, kluôm čar Dak Lak mâo êbeh 6,9 êklăk gưl mkă dlăng, mdrao klei ruă yua hră kak asei, êbeh 2,5 êklăk hră kak asei dưi bi mŭt gră ênua mdrao mgŭn. Anei jing boh tŭ dưn mphŭn kčưm hlăm bruă hluê ngă hdră êlan mđĭ kyar kdrăp dưn yua klei čih pioh mnuih ƀuôn sang leh anăn bi klă điện tử đru kơ klei bi mlih mrô ala čar (pia klah čŭn jing hdră êlan 06) ti alŭ wăl čar.

Thượng tá Võ Hùng Tường, khua adŭ bruă kahan ksiêmkriê dlăng bruă knŭk kna kơ klei êđăp ênang yang ƀuôn, kahan ksiêm čar Dak Lak brei thâo, êpul kahan ksiêm nao leh grăp sang mtô kơ mnuih ƀuôn sang mdưm hlăm đĭng blŭ, bi êran leh anăn yua account điện tử VneID , boh nik ti krĭng dleh dlan, krĭng tlaih kbưi, krĭng mnuih djuê ƀiă. Hluê anăn thâo srăng leh anăn klei sa ai mơ̆ng mnuih ƀuôn sang hŏng bi mlih hră mơar knŭk kna, bi mlih mrô dưi mđĭ hĭn klă nik.

 “Bi klă mlih mrâo hră mơar knŭk kna jing mta kñăm leh anăn kdlưn hĭn čiăng mđĭ boh tŭ dưn dŭm mta bruă mă, mkŏ mjing klei găl hĭn kơ mnuih ƀuôn sang, knơ̆ng bruă. Hlăm wưng êgao, hmei ngă jăk bruă đru kčĕ kơ khua gĭt gai kahan ksiêm čar, hluê ngă hrăm mbĭt dŭm hdră êla kriê dlăng bruă knŭk kna kơ klei êđăp ênang yang ƀuôn ti alŭ wăl”.

Hluê ngă hdră êlan mrô 06, hlăm 3 thŭn êgao, čar Dak Lak bi leh bruă hrui mă mkăp brei hră kak asei mâo čip kơ jih jang mnuih ƀuôn sang mâo djăp klei găl, mkăp brei account điện tử kơ êbeh 10.000 anôk bruă, êpul bruă. Truh kơ ară anei, giăm 10.000 hră mơar klei čih hdră bhiăn dưi ngă hŏng VneID; êbeh 90% bruă knŭk kna dưi mkăp brei online, mkŏ mjing klei bi mlih mơ̆ng hră mơar, jing klei čih pioh mrô.”

Mbĭt hŏng bruă hrăm mbĭt, kah mbha klei čih hưn mnuih ƀuôn sang, hdră êlan mrô 06 ti Dak Lak dôk ƀrư̆ ƀrư̆ đru msir hră mơar knŭk kna hluê êlan ênưih, găl leh anăn klă mngač hĭn kơ mnuih ƀuôn sang. Lu gru hmo mrâo msĕ si hưn anôk dôk hŏng phần mềm ASM, mlir msir hdră mơar knŭk kna hlăm bruă lăn ala, hlăm bruă lăn ala, djă pioh klei hưn phung yua lăn hŏng klei čih pioh ala čar kơ mnuih ƀuôn sang, VNeID amâodah kiosk čŏng ngă bruă ti dŭm anôk mdrao mgŭn đru bi hro mmông čang guôn, bi hrŏ klei bi tuôm klă anăp.

Hluê si Đại tá Trần Bình Hưng, K’iăng khua kahan ksiêm čar Dak Lak, čiăng kơ dŭm boh tŭ dưn anei dưi rơ̆ng kjăp, bruă klam mơ̆ng pô ba anăp dŭm anôk bruă, alŭ wăl mâo boh tŭ dưn yuôm bhăn êdi.

“Pô ba anăp mâo bruă klam ktrâo atăt, tă hdră leh anăn gĭt gai knuă druh, lĭng kahan hluê ngă bruă klam. Čiăng dưi ngă tŭ dưn hdră êlan mrô 06 hlăm thŭn 2025 leh anăn dŭm thŭn kơ anăp, bruă klam mơ̆ng phung khua gĭt gai dŭm anôk bruă, alŭ wăl jing yuôm bhăn êdi”.

Hŏng klei nao hgŭm hriăm mbĭt, ktang phĭt mơ̆ng bruă kđi čar, truh kơ ară anei, Dak Lak truh leh klei Mtah ti jih jang 102 să, ƀuôn hgŭm, bi leh kluôm 108 hnơ̆ng čuăng hluê si hdră êlan mrô 02 mơ̆ng êpul gĭt gai mơ̆ng gưl dlông kơ mtrŭt mđĭ klei mlih mrô bi mlir, hrăm mbĭt, pral leh anăn tŭ dưn. Dak Lak jing sa hlăm dŭm alŭ wăl tal êlâo mơ̆ng lăn čar bi leh bruă klam êlâo kơ hdră kčah, bi mâo djăp klei čiăng mkŏ dăp mnuih mă bruă leh anăn bi êran gru hmô bruă knŭk kna alŭ wăl dua gưl. Boh tŭ dưn anei lŏ dơ̆ng bi klă klei bi mlih hră mơar knŭk kna nao mbĭt hŏng hdră êlan mrô 06 amâo djŏ knŏng jing hdră êlan hdră mnêč, ƀiădah lŏ jing klei bi mlih hlăm hdră êlan kiă kriê, đru mđĭ hnơ̆ng jăk bruă đru kơ mnuih ƀuôn sang, knơ̆ng bruă leh anăn mâo gưl dlông bi myuôm./.