Leh 1 mlan ba yua gru hmô bruă knŭk kna alŭ wăl dua gưl, Dak Lak čih yap leh boh tŭ tal êlâo hlăm bruă ba yua kdrăp mrô – kreh knhâo mbĭt anăn ăt tlă anăp hŏng klei bi kpleh plah wah dŭm ƀuôn hgŭm hlăm klei bi mlih mrô lehanăn ngă bruă.  Čar bi leh 96 bruă klam hluê djŏ Hdră mtrŭn 71 mơ̆ng Knŭk kna, mbĭt anăn ba mdah hdră mă bruă mơ̆ng Klei bi kƀĭn online truh hŏng 102 ƀuôn hgŭm lehanăn mkŏ dưm camera ksiêm dlăng ti anôk bruă ngă hră mơar knŭk kna dŭm alŭ wăl.

Khă snăn, boh sĭt brei ƀuh, “Klei kpăk” hlăm anôk bruă nah gŭ ti Dak Lak ka mđrăm mbĭt. Lu ƀuôn hgŭm ka mâo maĭ mŏk mrâo. Klei bi kpleh ênoh hră mơar ba mơĭt êlan online mơ̆ng dŭm ƀuôn hgŭm lu; mâo anôk knŏng mâo 3- 5 hră mơar hlăm hruê. Klei kơ mnuih mă bruă, ƀiă phung knuă druh ƀuôn hgŭm mâo mjuăt bi hriăm kơ kdrăp mrâo. Ară anei, DakLak dôk čih mkra dua hdră bruă mđĭ kyar kdrăp mrâo, mlih mrô hlăm kluôm čar čiăng mjing tur knơ̆ng kơ wưng đĭ kyar mrâo. Mbĭt anăn, čar ăt ksiêm dlăng, mkŏ dăp mnuih mă bruă djŏ guôp čiăng rơ̆ng bruă klam mrâo hlăm gru hmô bruă knŭk kna alŭ wăl dua gưl./.