Hlăm klei bi kƀĭn, phung bi ala leh anăn hđeh sang hră dlăng leh Video hâo hưn, hmư̆ kơ akŏ gang mkhư̆ djah ksu; hiu dlăng klei rang mdah hŏng rup, hră mơar hâo hưn kơ klei gang mkhư̆ djah djâo ksu. Bruă ngă kñăm pŏk ngă Hdră bruă “Mđĭ pral bruă hâo hưn mtô mblang kơ klei gang mkhư̆ yua djah djâo ksu wưng 2021–2025” mơ̆ng Khua knŭk kna, mbĭt anăn klă klơ̆ng klei gĭt gai mơ̆ng Knơ̆ng bruă sang čư̆ êa čar Dak Lak hlăm bruă mđĭ klei thâo săng, bi mlih bruă ngă răng mgang wăl hdĭp mda, boh nik hlăm sang hră. Gưl anei, Anôk bruă mkŏ mjing ăt ksiêm dlăng leh anăn mđup brei klei pah mni kơ Klei bi lông mbruă kơ klei mkra wĭt mnơ̆ng mơ̆ng djah ksu, hŏng 17 klei pah mni kơ êpul, phung mâo mnơ̆ng dhơ̆ng mbruă, mâo boh sĭt.

Mâo klei pah mni mrô sa hŏng rup “Mnga mđup kơ nai” dưi mkra mơ̆ng giêt, đĭng ƀuôp ksu leh anăn kdô ksu yua leh, adei Nguyễn Ngọc Thảo My, hđeh sang hră gưl 2 Nguyễn Hữu Thọ, ƀuôn hgŭm Bình Kiến, čar Dak Lak kah mbha:

“Kâo ƀuh klei bi lông anei jing yuôm bhăn snăk, amâo djŏ knŏng đru kơ kâo mđĭ klei mĭn leh anăn klei thâo mbruă ôh, ƀiădah lŏ đru kâo thâo săng bruă klam pô hŏng wăl hdĭp mda mtah. Brei drei răng mgang wăl hdĭp mda, yua djah djâo ksu djŏ hdră”.