Dak Lak tuh êyuh jih klei găl msir mgaih klei dleh dlan leh gưl yan adiê ngă, mđĭ lar ai tiê bi hgŭm, gĭr bi leh klei kñăm mđĭ kyar bruă duh mkra - ala ƀuôn, boh phŭn jing mđĭ kyar dua ênoh mrô hlăm thŭn 2026. Anei jing hdră êlan dưi kčah hlăm Klei bi kƀĭn tal Dua, Êpul gơ̆ng bruă ƀuôn sang čar gưl X, mrâo mjưh ruê̆ tlam (24/12).

Hlăm klei bi kƀĭn phung bi ala tŭ ư bi mklă 24 hdră mtrŭn yuôm bhăn, mjing ttur knơ̆ng kơ klei mđĭ kyar bruă duh mkra- ala ƀuôn thŭn 2026 leh anăn wưng 2026–2031 msĕ si: bi kdung wưng dăp prăk bi liê hŏng dŭm hdră bruă yua prăk knŭk kna alŭ wăl; mbha prăk gưl dlông mbŏ mâo klei kñăm truh thŭn 2025; kčah ênoh lăn ti čar Dak Lak… Khua gĭt gai čar Dak Lak mtă mơ̆ng ară anei truh Tết Nguyên đán Bính Ngọ 2026, dŭm dhar bruă mđing hlue ngă jăk hdră êlan đru ba ala ƀuôn, kriê dlăng klei hdĭp mda mnuih ƀuôn sang; pŏk ngă tŭ dưn hdră kñăm ala čar kơ klei bi hrŏ ƀun kjăp leh anăn mđĭ kyar bruă duh mkra - ala ƀuôn krĭng mnuih djuê ƀiă. Êlâo hĭn, brei kƀĭn đru kơ mnuih ƀuôn sang kơrŭ wĭt bruă mkra mjing, hơĭt klei hdĭp mđa, drông Tết.