Gru mngač năng mđing jing hnơ̆ng klei mnia mblei dưi mâo leh anăn êngao hdră kčah thŭn, mkŏ mjing boh kdrŭt kơ knhal jih thŭn. Hnơ̆ng klei mnia mblei 9 mlan đăo tĭng mâo êbeh 2,3 êklai USD, đĭ êbeh 37% mkă hŏng wưng anei thŭn 2024 leh anăn êgao hdră kčah thŭn. Bruă hiu čhưn ênguê ăt đĭ kdlưn hĭn hŏng kluôm hnư hrui wĭt mâo êbeh 11.465 êklai prăk, đĭ 81%.

Bruă mnia mblei  lŏ dơ̆ng đĭ kyar jăk, hnơ̆ng čhĭ hliê mnơ̆ng dhơ̆ng leh anăn hnư hrui wĭt đăo tĭng mâo giăm 139 êbâo êklai prăk, đĭ 14%. Čiăng dưi mâo mta kñăm đĭ kyar kluôm thŭn 8%, bruă sang čư̆ êa čar bi klă đĭ kyar bruă duh mkra ala ƀuôn kluôm čar wưng tlâo mlan tal 4 srăng đĭ êbeh 10%. Tạ Anh Tuấn, khua bruă sang čư̆ êa čar Dak Lak mñă kơ dŭm knơ̆ng, dhar bruă, alŭ wăl srăng kñăm jih hnơ̆ng, mtrŭt bi pral klei brei čan duh kơ bruă knŭk kna, boh nik hlăm dŭm hdră kñăm, mtrŭt mđĭ klei bi lông blei lăn čiăng bi leh hnơ̆ng čuăn hnư hrui wĭt, mbĭt anăn ruh mgaih klei dleh dlan kơ dŭm hdră êngao ngăn prăk, mtrŭt mđĭ klei mlih mrâo hră mơar knŭk kna leh anăn răng mgang klei êđăp ênang.