Jing sa hlăm dŭm alŭ wăl hmăi kjham leh gưl hjan hlĭm êa lêč mrâo êgao, să Tuy An Nam, čar Dak Lak dôk ngă mbĭt dua bruă klam prŏng, mgaih msir boh jhat yan adiê ngă, bi hơĭt klei hdĭp mnuih ƀuôn sang leh anăn mprăp kơ klei ruah khua kơ anăp. Nguyễn Văn Hoàng, khua Bruă sang čư̆ êa ƀuôn hgŭm brei thâo, khadah adôk lu klei dleh dlan, ƀiădah klei ruah khua jing bruă klam kđi čar yuôm bhăn. Hlăm wưng anei, să kñăm krŭ wĭt klei mkra mjing, bi hơĭt klei hdĭp mnuih ƀuôn sang, mprăp dŭm klei găl čiăng kơ mnuih ƀuôn sang nao mplĕ hră ênŭm, êđăp ênang, djŏ hŏng klei čuăn.

“Hmei mkŏ mjing leh dŭm êpul bruă, êpul gĭt gai, ruah khua. Hmei ngă leh. Leh anăn hdră êlan dưi ngă leh, bi bruă klam ară anei jing hâo hưn. Hmei srăng hâo hưn hŏng pano, ap phich ăt msĕ msĕ hâo hưn hlăm anôk mđung asăp mơ̆ng să.”

Amâo djŏ knŏng Bruă sang čư̆ êa alŭ wăl dŭm gưl nao hgŭm, mnuih ƀuôn sang Dak Lak ăt bi êdah ai tiê bruă klam mơ̆ng mnuih ƀuôn sang hŏng hdră bruă kđi čar yuôm bhăn mơ̆ng lăn čar. La Văn Thanh, dôk ti alŭ Hiệp Đạt, să Ea Mdroh brei thâo, ñu dlăng nanao klei hưn, ksiêm kơ hruê mplĕ hră jing ngă djăp bruăk klam pô. Thanh hmăng hmưi:

“Jing sa čô mnuih ƀuôn sang, pô uêñ mĭn kơ klei ruah khua. Ăt msĕ mơh hnêč mmông čiăng ksiêm dlăng hlăm dŭm mbah hâo hưn. Kâo hmăng hmưi hlăm gưl ruah khua anei srăng mâo khua gĭt gai jih ai tiê leh anăn khăp kơ mnuih ƀuôn sang čiăng kơ mnuih ƀuôn sang dưi đĭ kyar hĭn.”

Bi klă, klei mplĕ hră duah phung bi ala Bruă Kbĭn ala gưl 16 leh anăn phung bi ala Êpul gơ̆ng bruă ƀuôn sang dŭm gưl joing bruă kđi čar yuôm bhăn, jing wưng kơ phung mplĕ hră leh anăn mnuih ƀuôn sang mâo klei dưi ngă phŭn hŏng hră mplĕ, ruah phung bi ala êdah êdi, năng hŏng klei čiăng mnuih ƀuôn sang, aduôn Cao Thị Hòa An, k’iăng khua êpul bruă Đảng čar, khua Êpul gơ̆ng bruă ƀuôn sang čar, khua dhar bruă ruah khua čar Dak Lak lač klă:

“Klei ruah khua jing bruă yuôm bhăn mơ̆ng lăn čar, srăng mâo klei êngiê, mtăp mđơr, djŏ hdră bhiăn, êđăp ênang, mkiêt mkriêm leh anăn klă sĭt jing hruê knăm mơ̆ng jih jang mnuih ƀuôn sang. Drei srăng gĭr leh anăn gĭr lu hĭn. Drei đăo knang srăng bi leh dŭm bruă klam mâo.”

Mñă ktang bruă klam mdua jing mgaih msir boh jhat yan adiê ngă, hluê ngă bruă klam kđi čar, Lương Nguyễn Minh Triết, Khua bruă Đảng čar Dak Lak mñă kơ dŭm gưl bruă, dhar bruă bi myuôm ai tiê bruă klam, mă bruă mjêč, kreh knhâo “Mă bruă dua blư̆, 3 blư̆”. Boh nik, jing êpul ngă gru hmô Bruă sang čư̆ êa alŭ wăl dua gưl, Lương Nguyễn Minh Triết, mñă kơ knuă druh ksiêm dlăng hră mơar, mđĭ klei bi mguôp, rơ̆ng kơ hnơ̆ng jăk dŭm bruă mprăp kơ klei ruah khua: 

“Mđĭ hĭn boh tŭ dưn bruă bi mguôp plah wah dŭm gưl bruă, dhar bruă, alŭ wăl, mbĭt anăn ngă dŭm hdră êlan bi mlih mrô, yua klei hưn mthâo mrâo mrang čiăng ngă klei ruah khua. Dŭm bruă hlăm klei mkŏ mjing čiăng mâo klei bi mguôp plah wah dŭm gưl bruă, dhar bruă, alŭ wăl hluê êlan ksiêm dlăng klă, ñĕ kơ klei lăp wĭt amâodah bi êgao bruă klam. Jih jang dŭm mta kñăm mbĭt jing mkŏ mjing tŭ dưn klei mplĕ hră ruah phung bi ala Bruă Kbĭn ala gưl 16 leh anăn bi ala Êpul gơ̆ng bruă ƀuôn sang dŭm gưl ti alŭ wăl čar”.

Mơ̆ng ƀuôn prŏng truh kơ krĭng ƀuôn sang, mơ̆ng anôk mâo klei găl truh kơ dŭm alŭ wăl dleh dlan leh hjan hlĭm êa lêč, bruă mprăp kơ klei ruah khua ti Dak Lak ăt dưi ngă hŏng ai tiê čŏng pô, bruă klam leh anăn mâo klei gĭr. Hŏng klei hrăm mbĭt mơ̆ng bruă kđi čar, klei sa ai mơ̆ng mnuih ƀuôn sang, čar Dak Lak dôk mđing truh mta kñăm mkŏ mjing tŭ dưn klei mplĕ hră ruah phung bi ala Bruă Kbĭn ala gưl 16 leh anăn phung bi ala Êpul gơ̆ng bruă ƀuôn sang dŭm gưl wưng thŭn 2026 - 2031, klă sĭt jing hruê knăm mơ̆ng jih jang mnuih ƀuôn sang, đru mkŏ mjing bruă Knŭk kna yang ƀuôn ngă phŭn mơ̆ng mnuih ƀuôn sang, kơ mnuih ƀuôn sang, kyua mnuih ƀuôn sang.