Dak Lak mkŏ mjing 1 êpul dlăng klei bi lông, hŏng 53 anôk bi lông hŏng 948 adŭ bi lông dăp ti dŭm sang hră ngưl 3 leh anăn anôk mtô jêñ jêñ ti alŭ wăl. Ênoh hđeh čih anăn bi lông êbeh 22.600 čô, hlăm anăn mâo êbeh 530 čô jing hđeh čŏng čih anăn bi lông.

Truh wưng ară anei, bruă ksiêm dlăng leh anăn mprăp mnơ̆ng dhơ̆ng ti dŭm anôk bi lông klă klơ̆ng dưi bi leh. Bruă bi doh wăl hdĭp mda, doh êƀăt mnơ̆ng ƀơ̆ng, mdrao mgŭn leh anăn hdră msir rơ̆ng êđăp ênang, mbha grông êlan ăt mâo bruă djŏ tuôm bi hgŭm pŏk ngă kjăp. Knơ̆ng bruă sang hră mtô bi hriăm Dak Lak mkŏ mjing leh dŭm adŭ mtô bi hriăm kơ êbeh 2.200 čô knuă druh, nai mtô, phung mă bruă đru hlăm klei bi lông.

Klei bi lông hriăm jih klei tlâo thŭn anei ti čar Kon Tum mâo êbeh 5.300 čô nao bi lông, hlăm anăn mâo giăm 1.800 čô hđeh mnuih djuê ƀiă. Kñăm rơ̆ng hnơ̆ng tŭ jăk klei bi lông ăt smĕ mơh mnđĭ boh tŭ klei bi lông, dŭm sang hră ti krĭng taih bưi lehanăn sang hră čiêm rông mnuih djuê ƀiă dôk mtô bi hriăm mbŏ kñăm bi kjăp klei thâo kơ phung hđeh.

Klei bi lông thŭn anei jing gưl tal êlâo Phŭn bruă Sang hră mơar bi mlih hdră bi lông, phung nai dôk gĭr mtô phung hđeh bi mưng hŏng akŏ klei bi lông hlăm mmông hriăm aguah tlam truh kơ hruê bi lông. Sang hră čiêm rông hđeh mnuih djuê ƀiă ăt mđing kơ klei hdĭp mnơ̆ng dhơ̆ng lehanăn ai tiê klei mĭn kơ phung hđeh, mjing klei găl kơ phung hđeh ba wĭt boh tŭ dưn hlăm klei bi lông./.