Mơ̆ng aguah ưm, lu mnuih ƀuôn sang ti să Hoà Thịnh leh anăn dŭm să jĕ giăm mâo leh ƀô̆ mta ti Knưng bi hdơr čiăng bi tuôm hŏng phung lĭng kahan êlâo kơ diñu wĭt. Klei mă kiê kngan, klei kmiêk khăp leh anăn mâo mơh êa ală luh mjing mmông bi tuôm mgei ai tiê êdi, bi ruê̆ 2 mlan lĭng kahan mbĭt hŏng mnuih ƀuôn sang leh gưl êa lip ka tuôm mâo. Ktuê dlăng klei anăn mơ̆ng ưm, Nguyễn Thị Hồng Nhị, sa čô nao ti sang hdră hđeh điêt Hoà Thịnh, anô jưh êjai mơ̆ng dŭm anôk bruă, ăt jing anôk bi mguôp plah wah phung nai, hđeh sang hră hŏng phung lĭng kahan brei thâo:

“Hlăm mmông diñu dôk ti sang hră mâo klei bi mguôp, jĕ giăm hŏng phung hđeh sang hră leh anăn phung nai hmei ăt khăp kơ diñu, ară anei bi ktlah ăt ƀuh klei ênguôt. Hruê anei jing hruê knhal tuč tuôm hŏng diñu, tinei amâo lŏ mâo mnuih ôh, nao sang čơ mnia ƀuh diñu ti dŭm bĭt êlan ară anei kăn lŏ ƀuh lei, êdei dih knơ̆ng hdơr đuč. Hlăm ai tiê hdơr nanao kơ phung lĭng kahan đru leh kơ hmei”.

Jing sa hlăm dŭm anôk bruă nao đru kơ alŭ wăl mơ̆ng hruê tal êlâo êa lip, Trung úy Phan Ngọc Dân, Trung đoàn 584, knơ̆ng gĭt gai lĭng kahan čar Dak Lak brei thâo, anôk bruă ngă bruă klam đru dŏng, mgaih msir boh jhat leh anăn lŏ wĭt mdơ̆ng sang đru kơ mnuih ƀuôn sang krĭng êa lip:

“Hruê anei hlăm mmông bi ktlah, mnuih ƀuôn sang kgŭ mơ̆ng 5h čiăng đru tŭk knă huă aguah, leh mmông huă ƀuôn sang hia lu sơnăk, amâo jhŏng hriê atăt tinei ôh, kyuanăn kâo mgei ai tiê êdi. Êjai wĭt ti anôk bruă hmei leh anăn phung lĭng kahan tinei srăng hdơr kơ dŭm hruê mlan mbĭt hŏng mnuih ƀuôn sang tinei găn klei êa lip ka tuôm mâo čiăng lŏ wĭt rŭ mdơ̆ng klei hdĭp kơ mnuih ƀuôn sang”.

Mơ̆ng hruê 1/12/2025 - 10/1/2026,  êbeh 204 êbâo gưl čô knuă, lĭng kahan kahan alŭ wăl 5, Knơ̆ng gĭt gai lĭng kahan čar Dak Lak leh anăn êpul kahan ƀuôn hŏng giăm 6.000 êdeh êdâo dưi tiŏ nao, mkŏ mjing 331 êpul, ngă bruă rŭ mdơ̆ng 331 boh sang đru kơ kơ dŭm gŏ sang mâo sang dlưh rai leh anăn mkra mđĭ 90 boh sang jhat rai ti 13 să, ƀuôn hgŭm. Nao mbĭt hŏng anăn, dŭm êpul bruă bi mguôp mbĕ đuê̆ hlăm brô 11.300 gŏ sang hŏng êbeh 36.000 čô nao ti anôk êđăp ênang, waih êmiêt 207 sang hră, 42 anôk bruă mdrao mgŭn, 281 sang dhar kreh, 38 anôk Bruă sang čư̆ êa, msir êbeh 50km êlan klông leh anăn đru kơ êbeh 3.500 gŏ sang bi doh wăl hdĭp, bi hơĭt klei hdĭp mda. Knŏng kơ êlan klông, knơ̆ng kdơ̆ng êa đru kơ yan puih mnga, dŭm anôk bruă mkŏ mjing 50 êpul, 98 anôk, bi leh êbeh 63.220m hdră bruă.

K’iăng khua Bruă sang čư̆ êa čar Dak Lak Đào Mỹ mñă ktang dŭm klei đru mguôp prŏng prĭng mơ̆ng lĭng kahan hlăm bruă bi mdrơ̆ng leh anăn msir boh jhat yan adiê ngă:

“Rup phung lĭng kahan leh anăn mnuih ƀuôn sang drei hdĭp mbĭt hlăm klei dleh dlan ƀiădah bŏ hŏng klei thâo khăp. Anăn jing dŭm bruă ngă jăk siam. kâo bi ala kơ khua gĭt gai čar lač jăk kơ phung lĭng kahan hlăm dua mlan êgao ngă hdră bruă Quang Trung leh anăn ară anei drei dôk tinei lač klei bi ktlah.”

Bi ruê̆ knăm bi ktlah, Đại tá Cao Văn Mười, k’iăng khua đru kčĕ bruă kahan alŭ wăl 5 mñă klă, Hdră êlan Quang Trung amâo djŏ knŏng ba wĭt dŭm boh sang kjăp, ƀiădah lŏ bi êdah ai tiê kơ klei khăp lĭng kahan mnuih ƀuôn sang, kơ ai ktang mơ̆ng klei thâo khăp leh anăn klei bi mguôp:

 “Grăp boh sang dưi ngă leh amâo djŏ knŏng kdrăp yua ƀiădah lŏ jing gru hmô klei đăo knang, mơ̆ng lĭng kahan mnuih ƀuôn sang amâo mâo dưi rai, jing klei hơuh mđao mơ̆ng mnuih ƀuôn sang leh anăn klei bi klă ti anôk mnuih ƀuôn sang dleh tinăn mâo lĭng kahan. Hdră êlan Quang Trung bi ruĕ lŏ čuê kơ knhuah gru lĭng kahan mơ̆ng yang ƀuôn, kyua mnuih ƀuôn sang đru bruă mơ̆ng lĭng kahan Awa Hồ, lŏ čih kač klei mmuñ kdrưh kơăm ênuk êđăp ênang, bi klă ai ktang mơ̆ng klei bi mguôp, klei nao hgŭm mơ̆ng bruă kđi čar leh anăn mnuih ƀuôn sang. Hdră êlan Quang Trung lŏ čuê kơ klei thâo khăp anak mnuih, dŭm boh sang kjăp leh anăn boh nik jing klei khăp lĭng kahan, mnuih ƀuôn sang lŏ kjăp hĭn.