Dŭm hruê anei, 5 čô hlăm Êpul mă bruă mrô 1 – Êpul kriê dlăng wăl anôk mnia mblei mrô 4, Anôk kriê dlăng wăl anôk mnia mblei čar Dak Lak kreh mđĭ mmông mă bruă. Amai Nguyễn Thị Minh Hạnh, pô mă bruă ksiêm dlăng brei thâo, êpul mă bruă dôk mđing ksiêm dlăng hdră mkra mjing, mnia mblei mơ̆ng êbeh 1.800 anôk bruă ti alŭ wăl ƀuôn prŏng Ƀuôn Ama Thuôt.

“Êpul mă bruă nao truh kơ dŭm gŏ sang mnia mblei, jing dŭm êpul, mnuih čiăng mtô mblang, mtă brei hluê ngă kjăp dŭm klei kčah mtrŭn mơ̆ng hdră bhiăn hlăm bruă pla mjing, mnia mblei. Hlăm anăn, brei dŭm gŏ sang blei mnơ̆ng rŏng hnơ̆ng tŭ jăk, phŭn agha klă nik, mƀlir lehanăn čhĭ djŏ ênoh, amâo lui klei mđĭ ênoh, pioh mnơ̆ng dôk guôn ênoh đĭ, mbĭt anăn brei rơ̆ng phŭn mkăp djăp ênŭm kơ wăl anôk mnia mblei hlăm wưng Têt djuê ana.

         Võ Thị Bạch Nga, sa čô čhĭ mnơ̆ng ti ƀuôn hgŭm Tân Lập, čar Dak Lak brei thâo, grăp blư̆ Têt djuê ana, anôk bruă djŏ tuôm kreh mtô mblang, mtrŭt mjhar, mtă kơ gŏ sang ƀuăn hluê ngă bruă mnia mblei klă mngač, djŏ hdră bhiăn.

“Akŏ mlan 1/2026, Knơ̆ng bruă kriê dlăng wăl anôk mnia mblei đru, ktrâo lač, brei gŏ sang sinê klei buăn mâo dŭm mta snei: Blei mnơ̆ng thâo klă phŭn agha kbiă hriê, rơ̆ng hnơ̆ng tŭ jăk, wưng ba yua amâo êgao hruê kčah; Tơdah mđĭ ênoh brei hluê ngă djŏ klei kčah mtrŭn bi mklă. Mprăp nanao mnơ̆ng mkăp kơ tuê blei yua.

         Hluê ngă hdră gang mkhư̆ mnơ̆ng mgưt, mnơ̆ng amâo tŭ jăk êlâo, hlăm lehanăn êdei kơ Têt djuê ana 2026 hluê si klei gĭt gai mơ̆ng Anôk gĭt gai 389 čar Dak Lak, mơ̆ng mlan 12./2025 truh kơ ară anei, Anôk bruă kriê dlăng wăl anôk mnia mblei čar Dak Lak trŭn kơ bruă nao ksiêm dlăng hdră mkra mjing, mnia mblei ti alŭ wăl, mđing kơ dŭm mta mnơ̆ng yua lu hlăm wưng Têt. Mơ̆ng hdră ksiêm dlăng, êpul hmao ƀuh, msir mghaih 242 anôk bruă ngă soh, đŭ bi kmhal êbeh 2,3 êklai prăk, mbĭt anăn hrui mă, bi rai jih mnơ̆ng ngă soh hŏng ênoh êbeh 700 êklăk prăk.

Vương Minh Sơn – Khua anôk bruă kriê dlăng wăl anôk mnia mblei čar Dak Lak brei thâo, khădah dŭm alŭ wăl nah Ngŏ hmăi mơ̆ng klei adiê hjan êa lip, ƀiădah ti krĭng Yŭ djŏ boh mnga bruă lŏ hma, ngă kơ ênoh blei mnơ̆ng Têt srăng đĭ mơ̆ng 25 – 30%. Anôk bruă srăng gĭt gai dŭm êpul nao ksiêm dlăng, krơ̆ng kjăp wăl anôk mnia mblei msĕ aguah tlam lehanăn hlăm êlan mạng.

“Hmei bi hgŭm hŏng Êpul kahan ksiêm bruă duh mkra mơ̆ng Anôk bruă kahan ksiêm čar, Anôk bruă jia čar pŏk hdră ksiêm dlăng hlăm gưl anei, mbĭt anăn mđĭ hdră ba nao êpul dôk gak jih hruê mlam, wăt knăm năm lehanăn kjuh, rơ̆ng dưi ksiêm dlăng wăl anôk mnia mblei lehanăn hmư̆ klei hâo hưn. Mta kñăm amâo lui klei mnơ̆ng mgưt, mnơ̆ng amâo thâo klă phŭn agha mŭt hlăm wăl anôk mnia mblei, mnơ̆ng anăn rơ̆ng mnuih ƀuôn sang dưi blei mnơ̆ng tŭ jăk hlăm wưng Têt anei.

          Ăt jing êpul phŭn hlăm hdră gang mkhư̆ mnơ̆ng mgưt, mnơ̆ng amâo tŭ jăk hlăm gưl anei, êbeh 1 mlan êgao, Adŭ bruă kahan ksiêm bruă duh mkra hlăm Anôk bruă kahan ksiêm čar Dak Lak bi rai 274 klei, msir mghaih 279 čô ngă soh djŏ tuôm kơ mnơ̆ng kăm, mnơ̆ng mgưt amâo tŭ jăk, čhĭ mjeh mdiê amâo thâo klă phŭn agha, mkra mjing, čhĭ êa drao răng mgang mnơ̆ng pla mjing mgưt, hăt soh hdră bhiăn, phao mơar soh hdră bhiăn… Kơ klei mđĭ hdră gang mkhư̆, bi kdơ̆ng hŏng klei ngă soh kluôm ala hlăm lehanăn êdei kơ Têt Bính Ngọ, Trung tá Trịnh Ngọc Hà, Kơiăng khua Adŭ bruă kahan ksiêm bruă duh mkra, Anôk bruă kahan ksiêm čar Dak Lak hâo hưn, êpul bi mklă leh bruă klam phŭn čiăng pŏk ngă.

Êpul kahan ksiêm bruă duh mkra mơ̆ng anôk bruă kahan ksiêm čar Dak Lak lŏ dơ̆ng ngă jăk hdră hmao ƀuh mơ̆ng kbưi, mơ̆ng nah gŭ, wăt hlăm alŭ wăl sĭt lehanăn êlan mạng. Alŭ phŭn jing dŭm ktuê êlan prŏng čar, boh nik êlan dơ̆ng prŏng 1A găn dŭm čar mŭt hlăm Dak Lak mbĭt hŏng dŭm alŭ wăl phŭn mkăn msĕ si anôk mkăm pioh mnơ̆ng, anôk bruă mnia mblei, hjiê dưm mnơ̆ng, kdrŭn êdeh, anôk bi mklin mnơ̆ng mgưt, amâo amâo tŭ jăk. Mơ̆ng anăn, bi hgŭm kjăp hŏng êpul djŏ tuôm hiu mă kơ̆ng lehanăn msir mghaih jih klei ngă soh djŏ hdră bhiăn.

Klei pral mơ̆ng dŭm êpul djŏ tuôm car Dak Lak hlăm hdră gang mkhư̆, bi kdơ̆ng hŏng bruă ngă soh hlăm hdră mkra mjing, dŭ mdiăng, hrui blei mnơ̆ng mgưt, amâo tŭ jăk hlăm wưng Têt Bính Ngọ 2026 dôk ba wĭt boh tŭ dưn jăk siam. Wăl anôk mnia mblei wưng Têt srăng dưi ksiêm dlăng kjăp, mnơ̆ng dhơ̆ng rơ̆ng klei tŭ jăk, čiăng mnuih ƀuôn sang hơĭt ai tiê blei mprăp, drông Têt êđăp ênang, djăp ênŭm lehanăn kluôm dhuôm./.