Lŏ dơ̆ng mđĭ lar bruă klam hlăm hdră bi kjăp klei hgŭm mguôp djuê ana, ti Klei bi kƀĭn tal 1, wưng thŭn 2025 – 2030, mkŏ mjing hlăm hruê 16 – 17/12, Mặt trận čar Dak Lak bi mklă leh 6 hdră bruă phŭn, mđing truh kơ klei sa ai hlăm yang ƀuôn lehanăn mđĭ lar ai ktang mnuih ƀuôn sang hlăm wưng mrâo. Hlăm wưng êgao, bruă mặt trận čar Dak Lak mđĭ lar leh bruă klam phŭn hlăm hdră bi mguôp djuê ana, mđĭ klei sa ai hlăm yang ƀuôn, mjing tur knơ̆ng bruă kđi čar yuôm bhăn čiăng kơ čar bi hơĭt lehanăn mđĭ kyar hlăm wưng ară anei. Hdră mtô mblang, mtrŭt mjhar mnuih ƀuôn sang dưi bi mlih hluê hdră mđing kơ nah gŭ; hdră ksiêm dlăng, tăng mgăl hlăm ala ƀuôn dưi pŏk ngă mâo mta phŭn, đru mkŏ mkra Đảng, bruă kinŭk kna alŭ wăl, mđĭ boh tŭ hdră kriê dlăng knŭk kna ti alŭ wăl. Mặt trận dŭm gưl ti Dak Lak bi êdah klă bruă kriê dlăng, ba yua jih klei găl mâo đru kơ ala ƀuôn, êdah êdi jing nao hgŭm hlăm hdră msir lăm sang dôk êjai, sang tĭ ƀrôč, pral mtrŭt mjhar klei đru kơ mnuih ƀuôn sang msir mghaih klei truh mơ̆ng yan adiê ngă, rơ̆ng djŏ mnuih, djŏ wưng. Klei kƀĭn tŭ ư leh 6 hdră phŭn lehanăn 13 hnơ̆ng čuăn hlăm wưng thŭn 2025–2030. Hlăm anăn, gĭr mtrŭt mjhar mdơ̆ng ƀiă êdi 1.000 boh sang bi hgŭm mguôp, đru ƀiă êdi 1.000 gŏ sang ƀun, giăm ƀun tlaih ƀun hơĭt kjăp, mđĭ klei ba yua kdrăp hâo hưn, kdrăp mlih mrô hlăm anôk bruă mặt trận.

Blŭ hrăm ti Klei bi kƀĭn, Lương Nguyễn Minh Triết, Khua bruă Đảng čar Dak Lak bi mni bruă klam phŭn bi kjăp klei hgŭm mguôp mơ̆ng bruă Mặt trận, mtă brei lŏ dơ̆ng mlih mrâo hdră mkŏ mjing, mă bruă mơ̆ng Anôk bruă Mặt trận hlăm wưng mrâo.

 “Ară anei, bruă Mặt trận čar hŏng gru hmô mrâo, lu klei bi mlih hlăm hdră mkŏ mjing, mta phŭn lehanăn hdră ngă bruă. Hlăm anăn, bruă klam phŭn hlăm bruă bi kjăp ai ktang bi hgŭm mguôp djuê ana jing prŏng snăk. Mặt trận brei jing boh sang mbĭt, anôk bi mklin, mđĭ lar ai ktang, klei mĭn mrâo mơ̆ng mnuih ƀuôn sang, iêu mtrŭt ai ktang hlăm mnuih ƀuôn sang kơ hdră mđĭ kyar wưng ti anăp”.

Mơ̆ng klei bi kƀĭn, Dhar bruă Mặt trận čar Dak Lak gưl sa, wưng thŭn 2025–2030 mâo 116 čô, 4 čô mkăp, tiŏ nao 17 čô bi ala klă klơ̆ng lehanăn 2 čô mkăp nao ti Klei bi kƀĭn bruă Mặt trận čar kwar Việt Nam gưl 1, wưng thŭn 2026–2031. Y Giang Gry Niê Knơng, Kơiăng khua bruă Đảng čar păn ngă Khua Dhar bruă Mặt trận čar Dak Lak gưl 1./.