Hruê 17/12, ti Anôk bruă Knŭk kna, Khua knŭk kna Phạm Minh Chính gĭt gai leh Klei kƀĭn tĭng dlăng boh tŭ “Hdră bruă Quang Trung” đru kơ mnuih ƀuôn sang msir mghaih klei truh leh gưl adiê hjan êa lip ngă dưi mkŏ online hŏng dŭm čar, ƀuôn prŏng mơ̆ng Hà Tĩnh truh kơ Lâm Đồng. Mơ̆ng hdră ksiêm dlăng, ênoh sang čiăng mdơ̆ng mrâo hlăk đĭ, ară anei mâo 1.622 boh sang dưi mdơ̆ng, đĭ 651 boh sang mkă hŏng klei hưn êlâo.

Bi mni kơ dŭm alŭ wăl Dak Lak, Gia Lai, Đà Nẵng mjêč hluê ngă hlăm wưng êgao, Khua knŭk kna mñă ai tiê “Hdră bruă Quang Trung” amâo mâo ênai phao ƀiădah brei bi leh tŭ dưi kluôm ênŭm, mjing klei mơak kơ mnuih ƀuôn sang hnưm bi hơĭt klei hdĭp. Mta kñăm srăng ngă leh bruă mkra mđĭ êlâo kơ hruê 31/12/2025 lehanăn ngă leh bruă mdơ̆ng mrâo êlâo kơ hruê 31/1/2026. Khua knŭk kna mtă kơ dŭm alŭ wăl, boh nik Gia Lai lehanăn Dak Lak, lŏ dơ̆ng ngă bruă kjăp hĭn, jao kơ Phŭn bruă kahan ksiêm, Phŭn bruă lĭng kahan, êpul êdam êra mđĭ lar ai tiê bi đru mbĭt čiăng kơ mnuih ƀuôn sang hơĭt ai tiê hdĭp mda duh ƀơ̆ng./.