Leh 3 hruê mkŏ mjing, mâo êbeh 800 čô mbruă mơ̆ng 26 să, ƀuôn hgŭm hlăm čar Dak Lak, bi ala kơ 9 djuê ana mâo: Ê Đê, M’nông, Jarai, Bahnar, Sedang, Bru Vân Kiều, Mường, Tày, Nùng. Dŭm êpul bi lông 5 mta: Tông čing, ayŭ kdrăp djuê ana, mmuñ, kdŏ lehanăn mdah wĭt knăm mơak djuê ana, hŏng êbeh 100 hdră jăk siam jiă knhuah djuê ana. Lu kdrêč knăm mơak mơ̆ng mnuih djuê ƀiă dưi mdah wĭty msĕ si: Ngă yang sang mrâo, knăm bi anăn, mơak đĭ prŏng, knăm mtrŭn gơ̆ng ngă yang, klei ngă yang ƀuôn, mbĭt hŏng dŭm êtuh hdră tông čing, kdrăp djuê ana, kdŏ mmuñ mâo ba mdah jăk êdi.

Hluê si Anôk bruă mkŏ mjing, dŭm êpul mâo klei mprăp ênŭm. Lu hdră dưi hluê ngă jiă knhuah djuê ana, bi êdah klă bruă klam phŭn mơ̆ng pô mbruă hlăm hdră kriê pioh lehanăn mđĭ lar knhuah gru dhar kreh čing čhar lehanăn kdrăp tông ayŭ djuê ana. Pô mbruă êdah kdlưn Bùi Thanh Hải, mnuih bi mklă puăng klei bi lông brei thâo:

 “Dŭm êpul hriê bi lông jăk êdi lehanăn mâo lu hdră. Hlăm dŭm knăm mơak ngă yang ăt dưi krơ̆ng kjăp knhuah gru mơ̆ng đưm êlâo. Mbĭt anăn, mâo dŭm klei dưi mkra mđĭ, mdah wăt klei kdŏ, tông ayŭ kdrăp djuê ana, mâo lu klei mrâo. Boh nik, kâo ƀuh êngao phung mbruă, phung khua mduôn asei leh khua ăt jih ai tiê duh myơr, lehanăn ăt mâo lu phung mda asei nao hgŭm kriê pioh kjăp dhar kreh djuê ana pô anei.

          Mjưh ruê̆ klei bi lông, anôk mkŏ mjing jao leh 8 klei pah mni kơ kluôm êpul êdah êdi, pah mni 37 hdră mdah jăk hĭn. Êpul phung mbruă să Liên Sơn Lăk mâo mă klei pah mni mrô Sa kluôm êpul ti anôk bi lông.