Hdră kčah mrô 60 hruê 18/9, Knơ̆ng bruă sang čư̆ êa čar Dak Lak mtă kơ dŭm alŭ wăl mđing ksiêm dlăng, mkŏ dăp lehanăn bi leh bruă bi mklă mrô krĭng lăn mơ̆ng mnuih ƀuôn sang msĕ si Hră dưi djă yua lăn, sang dôk, kak asei mŭt hlăm anôk bruă mrô hâo hưn kơ bruă lăn ala.

Leh 1 mlan pŏk ngă, hdră mprăp mkra hră kak lăn dưi ngă leh ti 102 să, êbeh 3,4 êklăk kdrêč lăn dưi mkăp mrô. Khă snăn, kluôm čar ăt dôk hlăm brô 520.000 kdrêč lăn ka djŏ guôp hŏng klei hâo hưn mdê bi pô. Čiăng rơ̆ng wưng hluê ngă, Knơ̆ng bruă sang čư̆ êa čar Dak Lak mtă kơ dŭm alŭ wăl mjêč ngă bi leh, bi mklă klei đua klam, mđĭ hdră bi hgŭm lehanăn mtrŭt mđĭ bruă mtô mblang truh kơ grăp alŭ, ƀuôn čiăng kơ mnuih ƀuôn sang thâo săng lehanăn mkăp ênŭm hră mơar. Bruă bi leh mrô lăn ala jing knhuang yuôm bhăn hlăm bruă mkŏ mjing anôk bruă knŭk kna mrô, yang ƀuôn mrô, hdră duh mkra mrô, mđĭ boh tŭ hdră mă bruă knŭk kna, bi hrŏ klei bi liê hlăm hdră ngă bruă kơ mnuih ƀuôn sang lehanăn anôk bruă duh mkra mnia mblei./.