Ti Anôk bi kƀĭn Anôk kriê dlăng bruă Đảng čar Dak Lak hruê 24/4, phung bi ala brei leh klei blŭ kơ bruă mkŏ dăp anôk bruă knŭk kna lehanăn dŭm bruă yuôm bhăn mkăn. Hluê si hdră, Dak Lak srăng bi hrŏ mơ̆ng 180 dôk 68 anôk bruă knŭk kna gưl să, mâo 62,22% hluê si Hdră mtrŭn 60-NQ/TW. Ti ƀuôn prŏng Ƀuôn Ama Thuôt srăng mkŏ dăp adôk 5 ƀuôn hgŭm lehanăn 1 să.

Klei bi kƀĭn ăt tŭ ư bi mŭt mbĭt čar Dak Lak lehanăn Phú Yên, mkŏ mjing čar mrâo dôk hlăm Gưl dlông, hŏng anôk bruă knŭk kna phŭn ti Dak Lak. Leh bi mŭt mbĭt, srăng mâo êbeh 18.000 km² ênhă, ênoh mnuih êbeh 3,3 êklăk čô hŏng 102 anôk bruă gưl să. Klah čŭn ti anôk bi kƀĭn, Khua bruă Đảng čar Nguyễn Đình Trung mtă kơ dŭm knơ̆ng, dhar bruă mơ̆ng čar Dak Lak bi hgŭm kjăp hŏng Phú Yên čiăng pŏk ngă tŭ dưn hdră bruă, boh nik mkŏ dăp anôk bruă, êdeh êdâo lehanăn anôk dôk kơ phung knuă druh mơ̆ng Phú Yên hriê mă bruă ti Dak Lak./.