Daklak ară anei mâo êbeh 4.100 boh hô̆ mran, hlăm anăn mâo 428 boh hô̆ mran mâo ai ktang 90CV kpưn hiu trah mă kan. Ktue hang ksĭ 189 km hang ksĭ, dŭm êbâo gŏ sang mnuih ƀuôn sang rông hdang kan lehanăn ngă bruă hiu čhưn ênguê hlăm êa ksĭ. Hlăk hlê krah yan hjan angĭn êbŭ, êpul êya djŏ tuôm lehanăn mnuih ƀuôn sang čar daklak čŏng mâo leh hdră mdrơ̆ng hŏng yan adiê ngă, răng mgang kjăp klei êđăp ênang kơ mnuih lehanăn ngăn dŏ bi hrŏ klei truh tơl.

Alŭ wăl Vũng Rô, ƀuôn hgŭm Hòa Xuân Nam, ară anei mâo êbeh  600 boh war rông kan hlăm êa, mâo 68 boh hô̆ mran prŏng trah mă kan, mbĭt hŏng 140 boh hô̆ mran mơ̆ng dŭm čar mkăn kreh hrie jưh mdei. Anei jing krĭgn êngăn angĭn, dưi yap jing anôk jăk kơ bruă kdê đuĕ kơ angĭn êbŭ. Êngao kơ bruă răng mgang hlăm êa ksĭ, kahan răng mgang knông lăn, kreh hgŭm nanao hlăm bruă mdrơ̆ng hŏng klei yan adiê ngă, đru phung trah mă kan, lehanăn mnuih ƀuôn sang hdĭp hlăm êa ksĭ. Klei bi mguôp kjăp anei, kñăm bi hrŏ djăp mta klei truh tơl jŭ jhat, lŏ mjing klei găl kơ mnuih ƀuôn sang đru răng kriê êa ksĭ, lehanăn mđĭ kyar klei hdĭp mda mơ̆ng êa ksĭ./.