Kbưi hŏng wăl krah Đà Lạt hlăm brô 40km, să Dran mâo wăl krah Dran siam êdi dôk ti krah 2 kčŭn čư̆ Ngoạn Ngục leh anăn Dran (êlâo ti jing kdriêk Đơn Dương, čar Lâm Đồng hđăp), anôk anei lŏ mâo anăn pia mkăn jing wăl krah Rŏng čư̆.

Să Dran čar Lâm Đồng dưi mkŏ mjing mơ̆ng bi mŭt mbĭt să Lạc Xuân leh anăn wăl krah Dran, mâo ênhă êbeh 240km2, mnuih ƀuôn sang 33.000 čô, hlăm anăn mâo êbeh 20% jing mnuih K’ho, Chu ru, Mạ, Nùng, Thái… bruă Đảng să ară anei mâo 51 anôk bruă hŏng êbeh 600 čô đảng viên, mâo bruă klam kmeh gơ̆ng hlăm klei gĭt gai mđĭ kyar bruă duh mkra ala ƀuôn ti alŭ wăl.

Trương Quang Kiên, k’iăng khua Bruă sang čư̆ êa să Dran brei thâo, knuă druh, đảng viên leh anăn mnuih ƀuôn sang ti alŭ wăl hmăng hmưi klei kƀĭn kluôm tal 14 mơ̆ng Đảng srăng mâo dŭm hdră êlan uêñ mĭn, đru kơ krĭng mnuih djuê ƀiă:

“Alŭ wăl mâo êbeh 20% jing mnuih djuê ƀiă. Hmăng hmưi Klei kƀĭn kluôm mơ̆ng Đảng srăng mâo dŭm hdră tă kơ dŭm hdră êlan, đru kơ mnuih djuê ƀiă. Hdră êlan phŭn hŏng dŭm krĭng mnuih djuê ƀiă ti alŭ wăl să si srăng ngă čiăng mkŏ mjing klei găl kơ mnuih ƀuôn sang mđĭ kyar bruă duh mkra ala ƀuôn mđĭ hnư hrui wĭt hlăm krĭng mnuih djuê ƀiă”.

Thŭn 2025, hnư knŭk kna hrui wĭt mơ̆ng să Dran, čar Lâm Đồng mâo êbeh 192 êklai prăk, êgao hdră kčah čar jao. Anei jing tur knơ̆ng yuôm bhăn čiăng kơ Dran mŭt hlăm wưng đĭ kyar mrâo hŏng lu mta kñăm prŏng hlăm thŭn 2026, mơ̆ng mđĭ kyar bruă duh mkra ala ƀuôn truh kơ bruă lĭng kahan, răng mgang klei êđăp ênang, bi mlih mrô, truh kơ mđĭ hnơ̆ng klei hdĭp, ai tiê mnuih ƀuôn sang. Mai Linh Sơn, Khua dhar bruă mặt trận să Dran mñă klă klei hmăng hmưi mơ̆ng mnuih ƀuôn sang hlăm klei kƀĭn kluôm tal 14 mơ̆ng Đảng, boh nik hlăm wưng ngă Bruă sang čư̆ êa alŭ wăl dua gưl, jĕ giăm hŏng mnuih ƀuôn sang, mpŭ kơ mnuih ƀuôn sang leh anăn kyua mnuih ƀuôn sang:

“Kâo đăo knang, hmăng hmưi kơ klei kƀĭn kluôm 14 mơ̆ng Đảng. Kâo ăt msĕ hŏng mnuih ƀuôn sang jing hmăng hmưi kơ êdei anăn. Hŏng gru hmô ară anei drei ngă Bruă sang čư̆ êa alŭ wăl dua gưl jing jĕ hŏng mnuih ƀuôn sang, mpŭ kơ mnuih ƀuôn sang leh anăn bi mâo djăp klei čiăng, klei hmăng hmưi mơ̆ng mnuih ƀuôn sang. Êjai hdră mtrŭn klei kƀĭn kluôm tal 14 mơ̆ng Đảng dưi ngă srăng mđĭ hnơ̆ng klei hdĭp mnuih ƀuôn sang leh anăn mđĭ kyar bruă duh mkra ala ƀuôn mơ̆ng alŭ wăl, mơ̆ng lăn čar. Bi lar bruă klam mơ̆ng phung mă bruă knŭk kna ngă jăk bruă klam mâo Đảng, knŭk kna jao”.

Lâm Đồng ară anei jing čar mâo ênhă prŏng hŏng Việt Nam hŏng êbeh 24.200 km2, mnuih ƀuôn sang 3,8 êklăk čô. Bruă Đảng čar Lâm Đồng ară anei mâo êbeh 124.000 čô đảng viên ngă bruă ti 128 anôk bruă Đảng nah gŭ. Hŏng klei đăo knang kơ klei gĭt gai mơ̆ng Đảng pŏk dŭm hdră êlan kdlưn hĭn ba lăn čar leh anăn dŭm alŭ wăl nao hlăm ênŭm đĭ kyar mrâo./.