Ti ƀuôn hgŭm Phú Yên, sa hlăm dŭm alŭ wăl êa lip êlam, leh klei êa hrŏ, anôk bruă sang čư̆ êa pral lŏ wĭt mă bruă hŏng mnuih ƀuôn sang. Grăp hrue anôk bruă mâo tŭ mă truh êbeh 100 hră mơar, lu hră mơar nao lŏ bi mklă, hră mơar lăn ala hră mơar gŏ sang. Hồ Thị Bước, alŭ Lộc Đồng, brei thâo klei êa lip ngă êngăp truh kơ čuôr sang, jih jang ngăn dŏ hră mơar mơ̆ng gŏ sang êa mđung jih. Čiăng mâo klei găl mghaih msir klei bi mmiă lăn ala ti sang phat kđi, ñu lŏ nao kơ ƀuôn hgŭm ngă hră hưn ung ñu djiê.

“Kâo dôk guôn ăt pral mơh, amâo mâo sui ôh, kyua mă mrô ngă hră mơartăp mâo dôk guôn tăp anăn, phung knuă druh mă bruă jăk snăk, ktrâo atăt pô lŏ wĭt ngă hră mơar, diñu hŏng klei mơak đru pô ngă hră mơar.”

Čiăng kơ mmông dôk guôn lehanăn đru mnuih ƀuôn sang êjai dôk hlăm klei dleh dlan êdei kơ klei êa lip, bruă sang čư̆ êa alŭ wăl tiŏ nao leh lu êpul êya bi mghaih msir hră mơar. Êngao kơ knuă druh, mnuih truăn kơ bruă, mnuih mă bruă dăng kông ăt mâo tiŏ nao đru kơ anôk mă bruă sa ƀăng bhă.

Huỳnh Thị Lệ Chi, mnuih mă bruă dăng kông ƀuôn hgŭm Tuy Hòa, mâo tiŏ nao đru kơ anôk mă bruă hră mơar ƀuôn hgŭm Phú Yên, brei thâo bruă mđing đru kơ mnuih ƀuôn sang bi leh jih jang hră mơar mă bruă hŏng điện tử, boh nik hŏng mnuih khua thŭn, mnuih amâo mâo thâo hlăm kdrăp mrâo.

 “Kâo đru mnuih ƀuôn sang ngă hră mơar, lu jing hriê lŏ bi mklă hră mơar, ngă hră mơar djŏ tuôm hŏng lăn. Kâo ktrâo atăt êjai, lehanăn hlŏgn đru mnuih ƀuôn sang.”

 Tui si Nguyễn Xuân Cảnh, Khua knơ̆ng bruă sang čư̆ êa ƀuôn hgŭm Phú Yên, leh klei êa lip bruă ngă hră mơar lu hĭn, mâo lu mnuih ƀuôn sang luič jih hră mơar phŭn. Ti anăp klei msĕ snăn, alŭ wăl lŏ dơ̆ng pŏk dŭm êpul đru bruă hŏng ƀuôn sang, tiŏ nao knuă druh truh hŏng ƀuôn sang ktrâo atăt, đru mnuih ƀuôn sang ngă hră mơar, lŏ thiăm dŭm hră mơar mrâo.

“Adŭ bruă ngă hră mơar tiŏ nao leh 1-2 knuă druh truăn kơ bruă ktrâo atăt kơ klei bhiăn. Sui sa blư̆ tiŏ nao phung êdam êra, anôk bruă dăng kông bi đru, tơdah mâo klei čiăng kơ mnuih mă bruă.”

Amâo mâo djŏ knơ̆ng Phú Yên, jih jang dŭm boh ƀuôn hgŭm nah ngŏ čar Daklak hmăi amâo mâo jăk sơăi mơ̆ng klei êa lip. Hlăm anăn, 3 anôk bruă ngă hră mơar ti Hòa Xuân, Đông Hòa lehanăn Tuy An Tây anôk êa lip êlam, ngă jhat rai jih kdrăp mă bruă, lehanăn hmăi amâo mâo jăk hŏng jih jang bruă knuă. Dŭm êpul êya anei luič leh sa hrue kăm čiăng lŏ kơrŭ bruă, lehanăn wĭt mă bruă msĕ si aguah tlam.

 Ti ƀuôn hgŭm Tuy An Đông, anôk ngă hră mơar bruă knŭk kna ăt êngăp mơh, lu kdrăp mă bruă jhat sơăi. Siămdah, bruă sang čư̆ êa pral lŏ mkra wĭt, lŏ tiŏ nao mnuih mă bruă kñăm čiăng amâo mâo bi kpăk ôh klei mă bruă ngă hră mơar hŏng mnuih ƀuôn sang. Trần Văn Biên, Khua knơ̆ng bruă sang čư̆ êa ƀuôn hgŭm  Tuy An Đông brei thâo:

“Truh ară anei anôk bruă anei mă bruă leh, hlăk dôk đru mnuih ƀuôn sang ngă hră mơar. Msĕ si lŏ wĭt ngă hră mơar pioh yua tal êlâo hlăm gŏ sang. Ară anei ênoh knuă druh mnuih mă bruă mâo leh djăp, ƀuh mnuih ƀuôn sang čiăng ngă hră mơar prŏng, srăng lŏ iêo jak phung êdam êra, lehanăn dŭm êpul êya hriê mă bruă čiăng hmao ngă hră mơar kơ mnuih ƀuôn sang.”

Leh sa mlan găn klei êa lip lêč, mâo lu klei mtŭk mtŭl kơ hră mơar mnuih ƀuôn sang krĭng êa lip nah ngŏ čar Daklak, snăn dưi mghaih msir leh hŏng klei êđăp ênang. Ară anei lŏ mđĭng kơ kdrăp mă bruă bi djăp ênŭm kơ dŭm alŭ wăl msĕ si kơ Tuy An Đông amâodah Phú Yên amâo mâo lui ksŭn ôh hră mơar. Dŭm mta hră maơr mrâo lŏ ngă pral dưi jing leh mnơ̆ng yuôm bhăn djŏ hŏng klei bhiăn kơ mnuih ƀuôn sang hiu duah ƀơ̆ng, lehanăn mghaih msir bruă knuă leh klei êa lip./.