Êbeh 8 h aguah hrue 1/7 ti anôk ngă bruă hră mơar ƀuôn hgŭn knông lăn Bờ Y, čar Quảng Ngãi mâo leh 16 čô mnuih ƀuôn sang nao ngă hră mơar, lu jing hră mơar kơ lăn ala. Nguyễn Thanh Hùng, pô klam bruă kơ bruă ngă hră mơar hŏng mnuih ƀuôn sang, brei thâo, ƀuôn hgŭn knông lăn Bờ Y mâo kdriêl knông lăn hŏng ala dua ala čar  Lào lehanăn Campuchia. Ƀuôn hgŭm mâo bi mŭt dŭm boh să: Pờ Y, Đăk Xú lehanăn wăl krah Plei Kần. Leh klei bi mŭt, ƀuôn hgŭm mâo leh ênhă prŏng êbeh 240km2, hŏng ênoh mnuih truh êbeh 35.000 čô mnuih. Anôk mă bruă phŭn jing ti anôk bruă hră mơar wăl krah Plei Kần, kdriêk Ngọc Hồi, čar Kon Tum (hđăp). Nguyễn Thanh Hùng, lač:

 “Anôk bruă ngă hră mơar mâo bruă Đảng ƀuôn hgŭm jao kơ 9 čô knuă druh mnuih mă bruă. Lu jing knuă druh mơ̆ng  să Pờ Y, Đăk Xú lehanăn wăl krah Plei Kần hđăp nao mă bruă anôk bruă ngă hră maơr ƀuôn hgŭm. Hmei jao leh djăp bruă klam kơ bruă ngăn dŏ wăl; hdĭp mda, bruă lŏ hma, bruă mnia mblei, bruă rŭ mdơ̆ng, bruă dhar kreh lehanăn bruă hlue ngă hdră bhiăn. Diñu djăp klei dưi mă bruă kơ mnuih ƀuôn sang”.

Boh sĭt brei ƀuh hlăm klei tŭ mă, lehanăn mghaih msir hră mơar kơ mnuih ƀuôn sang, knuă druh anôk bruă ngă hră mơar ƀuôn hgŭm Bờ Y mâo leh lu hrue mmông ktrâo atăt, đru kơ mnuih ƀuôn sang kơ klei mrâo, kơ dŭm klei bi mlih hlăm hdră mă bruă. Lu mnuih ƀuôn sang ka thâo săng klă ôh ya ƀuôn hgŭm pô jing hlăm čar Quảng Ngãi. Hoàng Hữu Sửu dôk ngă hră mơar kơ 2 čô anak ñu dưi dưn ngăn lăn ala, snăn ƀuh phŭn tal êlâo dôk dleh dlan. Ƀiădah leh kơ anăn ñu mâo ngă hră mơar hŏng klei pral, kyuadah hdră mă bruă thâo lehanăn kjăp mơ̆ng knuă druh anôk bruă ngă hră mơar.

 “Phŭn tal êlâo lu mnuih dôk ka thâo bĭt êlan mă bruă, kyuadah mơ̆ng sa boh čar Kon Tum ară anei jing hĕ čar Quảng Ngãi. Êlâo mơ̆ng 3 gưl, ară anei dôk mă 2 gưl. Aguah anei, klei ngă hră mơar ƀuh jing ênưih mơh. Phung adei adei mă bruă hŏng jih ai tiê, mơak drông lehanăn atăt hlăm klei mă bruă jăk”.

Čiăng mâo klei jăk gưl kơ mnuih ƀuôn sang, mbĭt hŏng klei ktrâo atăt hưn mthâo hdră mă bruă hlăm ƀuôn hgŭm mrâo, snăn hŏng klei hâo hưn, lehanăn bi lar truh hŏng jih jang mnuih ƀuôn sang, wăt hlăm hla pŏk yang ƀuôn, hrue mă bruă tal êlâo mtam, knơ̆ng bruă sang čư̆ êa dŭm boh ƀuôn hgŭm bi tiŏ nao leh knuă druh, ktrâo atăt mnuih ƀuôn sang ngă hră mơar.

Leh klei bi mŭt čar Kon Tum, čar Quảng Ngãi mâo 9 boh ƀuôn hgŭm knông lăn bi knông hŏng dua ala čar Lào lehanăn Campuchia mâo kdriêl knông lăn êbeh 292km. 9 ƀuôn hgŭm knông lăn čar Quảng Ngãi, mâo: Bờ Y, Sa Loong, Dục Nông, Đăk PLô, Đăk Long, Rờ Kơi, Mô Rai, Ia Tơi lehanăn Ia Đal.