Leh 32 thŭn mkŏ mjing leh anăn đĭ kyar, anôk bruă jưh ti Lăn Dap Kngư dưi bi klă kơhưm mơ̆ng sa anôk bruă klei mrâo gưl dlông jưh ti alŭ wăl, mâo bruă klam yuôm bhăn hluê ngă dŭm hdră mđung asăp blŭ mnuih djuê ƀiă, mđung hlăm êlan mđung ala čar. mbĭt hŏng bruă čuh mkra hdră mđung 6 klei blŭ: Êđê, M'Nông, J'rai, Kơ Ho, Bahnar leh anăn Sêdang, lŏ čuê hdră mđung asăp blŭ klei Mông, Thái, anôk bruă jưh ti Lăn Dap Kngư lŏ mkŏ mjing klei mă asăp ênai čing, klei mmuñ ênhiang, klei yăl dliê đưm Lăn Dap Kngư, ksiêm duah klei kreh knhâo đru kơ klei mblang leh anăn mđung asăp blŭ mnuih djuê ƀiă, hâo hưn, bi êdah dŭm bruă hlăm klei hdĭp mda, bruă duh mkra ala ƀuôn hŏng dŭm klei čih klei mrâo hlăm dŭm mbah mđung mơ̆ng Sang mđung asăp blŭ Việt Nam.

Đinh Hữu Trường, Khua hđăp adŭ bruă phung čih klei mrâo VOV Lăn Dap Kngư bi êdah, klei sa ai, hrăm mbĭt, bi mguôp mơ̆ng phung knuă druh, phung mă bruă ti anôk bruă srăng jing tur knơ̆ng, boh kdrŭt čiăng lŏ dơ̆ng ngă bruă klam hlăm wưng mrâo, hrăm mbĭt hŏng lăn čar, alŭ wăl, bi êdah ai tiê bi mguôp, găn klei dleh dlan – mbruă, knhuah gru – bi kna”.