Mâo ƀô̆ mta hlăm knăm bi hluh êlan êdeh êlan dơ̆ng pral Khánh Hòa – Buôn Ma Thuột  hlăm hruê 19/12 mrâo êgao, lu mnuih ƀuôn sang alŭ wăl bi êdah klei hơ̆k mơak êjai dŭm bĭt êlan prŏng dưi bi luh êlan êdeh, hmăng hmưi bi hrŏ mmông êrô êbat, mkŏ mjing klei găl mnia mblei, mđĭ kyar bruă mkra mjing, hiu čhưn ênguê leh anăn mđĭ hnư hrui wĭt. Nguyễn Văn Hạ, ti să Ea Knuêč, mâo êbeh 4 sào lăn hlăm klei hrui wĭt, ngă mkra êlan anei, mgei ai tiê brei thâo:

 “Anei jing klei hmăng hmưi mơ̆ng mnuih ƀuôn sang tinei, hơ̆k mơak êdi, mâo êlan dơ̆ng pral, đru kơ klei mnia mblei, boh mnga dưi mâo pô hriê blei ti đang dưi mđĭ ênoh, rơ̆ng kơ hnơ̆ng jăk, tal 2 jing ênoh đĭ hĭn”.

Amâo djŏ knŏng pŏk êlan klông, êlan dơ̆ng pral lŏ pŏk klei đăl đĭ kyar mrâo kơ dŭm krĭng pla mjing. Ngô Thị Minh Trinh, khua dlăng bruă Đảng să Ea Knuêč, alŭ wăl mâo êlan dơ̆ng pral găn hŏng 6 anôk găn, mbĭt anăn jing krĭng pla mjing durian prŏng hlăm čar hŏng êbeh 5.100ha lač:

 “Kâo mĭn mơ̆ng dŭm anôk bi găn anăn mâo klei mkŏ bruă mnia mblei leh anăn mâo klei bi mguôp bruă duh mkra ala ƀuôn. Êlâo dih kdriêk Krông Pač hđăp čuăl mkă leh wăl anôk bruă tuh tia Tân Tiến, nah êngao jing wăl anôk logictic čiăng mâo klei bi mguôp kjăp leh anăn ba yua klei găl mơ̆ng dŭm alŭ wăl čiăng mkŏ mjing sa krĭng mđĭ kyar bruă duh mkra ala ƀuôn mơ̆ng alŭ wăl.”

Hdră kdrêč tal 3 êlan dơ̆ng pral Khánh Hòa – Buôn Ma Thuột mâo boh taih 48km găn 7 să, mbĭt hŏng bruă klam jing êlan mgăn mkŏ Lăn Dap Kngư hŏng Dhŭng kwar krah. Mbĭt hŏng anăn, êlan Hồ Chí Minh kdrêč êlan dar Ngŏ Ƀuôn Ama Thuôt taih giăm 40km dôk đru bi hrŏ klei kpăk đuôm hlăm êlan wăl krah, mđĭ hnơ̆ng jăk ba yua êlan klông mlir krĭng.

Ti nah Ngŏ čar Dak Lak, leh êbeh 10 thŭn čang guôn, Wăl anôk hiu čhưn ênguê mdei msăn Cù Lao Mái Nhà klă klơ̆ng dưi mphŭn rŭ mdơ̆ng ti knhal jih thŭn 2025. Hŏng ênhă ba yua lăn leh anăn ƀô̆ êlah êa hlăm brô 137ha, ênoh duh bi liê giăm 5.000 êklai prăk, hdră anei hmăng hmưi dưi mkŏ mjing boh kdrŭt mrâo kơ bruă tuh tia - mkra mjing, mbĭt anăn lăm hĕ klei uêñ mĭn lăn lui êruh ƀiădah bŏ hŏng klei găl. Võ Văn Ngầu, mnuih ƀuôn sang să Ô Loan brei thâo:

 “Hơ̆k mơak hdră dưi phŭn ngă, kyua hdră mâo mơ̆ng êlâo, mnuih ƀuôn sang čang guôn. Ară anei hơ̆k mơak truh mgei ai tiê kyua hdră dưi ngă alŭ wăl pô srăng jing anôk mngač”.

Klă sĭt brei ƀuh, čiăng mâo mta kñăm đĭ kyar 10% kơ dlông hluê si hdră mtrŭn mơ̆ng čar, Dak Lak čiăng mâo dŭm hdră prŏng, mâo ai lar bra ktang. Ară anei alŭ wăl ktuê hang ksĭ mâo 43 hdră dưi mkăp brei hŏng ênoh duh bi liê hlăm brô 90.000 êklai prăk. Boh klei phŭn jing ai tiê mgaih msir mơ̆ng dŭm knơ̆ng, dhar bruă, leh anăn alŭ wăl hlăm bruă hrăm mbĭt hŏng knơ̆ng bruă, ruh mgaih dŭm klei kpăk. Anăn ăt jing klei phung duh bi liê čang guôn. Đào Mỹ, k’iăng khua Bruă sang čư̆ êa čar Dak Lak brei thâo:

“Hmei mâo leh dŭm hdră kơ klei đĭ kyar leh anăn mâo klei gĭt gai dŭm hdră anăn brei hmei ksiêm dlăng grăp thŭn čiăng hrăm mbĭt kpưn đĭ kơ anăp.”

Hluê si hdră êlan, nah ngŏ čar Dak Lak srăng lŏ dơ̆ng ngă dŭm hdră hnơ̆ng prŏng, hlăm anăn mâo 3 hdră kñăm ti wăl anôk bruă duh mkra Nam Phú Yên mâo:  Mâo kdrŭn ksĭ Bãi Gốc, wăl anôk bruă tuh tia mkra mjing Hoà Tâm leh anăn wăl anôk bruă tuh tia kdrăp mrâo mrang Phú Yên, hŏng ênoh duh bi liê hlăm brô 5 êklai dolar Mi hlăm ênhă 750ha. Dŭm hdră bruă anei dưi hmăng hmưi srăng ba yua lăn ktuê hang ksĭ, mkŏ mjing boh kdrŭt kơ alŭ wăl bruă tuh tia - mkra mjing lŏ dơ̆ng jing bruă ba anăp đĭ kyar hlăm thŭn 2026 leh anăn dŭm thŭn kơ anăp.