https://vov4.vov.vn/ede/klei-mrao-yang-uon-thoi-su-xa-hoi/klei-cih-hiu-chun-engue-dak-lak-duah-klei-edah-kdlun-hlam-wal-mrao-klei-cih-tal-1-hiu-chun-engue-dak-lak-nah-tluon-dum-kdrec-elan-jhat-518022.vov4

Giăm 15 thŭn mơ̆ng leh dưi tŭ ư hdră êlan duh bi liê, truh knhal jih thŭn 2025, Hdră wăl anôk hiu čhưn ênguê mdei săn Cù Lao Mái Nhà ti să Ô Loan, čar Dak Lak klă klơ̆ng rŭ mdơ̆ng. Hdră anei prŏng giăm 200 ha, hŏng ênoh duh 5.000 êklai prăk, dưi čuăl mkă jing wăl anôk hiu čhưn ênguê krĭng ksĭ hŏng hnơ̆ng čuăn 6 mtŭ. Ăt msĕ hŏng lu mnuih hdĭp ktuê wăl anôk mdei săn krĭng ksĭ ti Dak Lak, Võ Văn Ngầu, ti să Ô Loan čang hmăng, anei srăng jing boh kdrŭt bi ƀrơ̆k mdih klei găl hiu čhưn krĭng ksĭ mơ̆ng alŭ wăl.

“Mnuih ƀuôn sang dôk guôn mơ̆ng sui leh. Tơdah hdră anei dưi pŏk ngă kjăp srăng jing anôk truh siam êdi mơ̆ng alŭ wăl.

Khădah hdră rŭ mdơ̆ng ƀuăn srăng ba wĭt lu boh tŭ dưn, ƀiădah leh giăm mkrah thŭn hluê ngă, hdră 5.000 êklai prăk knŏng mrâo ngă kdrêč bruă mơ̆ng 40 êklai prăk. Anei jing boh klei mâo msĕ ti lu hdră bruă prŏng ti Dak Lak. Hluê si klei ksiêm yap, kluôm čar mâo 39 hdră hiu čhưn ênguê mâo mkăp hdră duh bi liê, hlăm anăn mâo truh 28 hdră bruă hŏng ênoh prăk êbeh 16.850 êklai prăk dôk tuôm hŏng klei dleh dlan, gun kpăk sui.

Čiăng mtrŭt mđĭ wưng hluê ngă dŭm hdră bruă phŭn, čar Dak Lak mkŏ mjing leh dŭm êpul thơ̆ng kơ bruă msir mghaih dŭm klei gun kpăk, “pŏk hdră 30 hruê mlam ruh mtlaih klei gun kpăk bruă msir mghaih anôk ala”. Lu êpul nao truh kơ nah gŭ čiăng msir mghaih dŭm klei gun kpăk, mtrŭt mđĭ wưng hluê ngă.

Hluê si Đào Mỹ, Kơiăng khua knơ̆ng bruă sang čư̆ êa čar Dak Lak, bruă msir mghaih dŭm hdră êmưt hlue ngă amâo djŏ knŏng kñăm bi hrŏ klei luič liê klei găl mâo mơ̆ng lăn ala, ƀiădah lŏ mjing klei găl mkŏ mjing boh kdrŭt đĭ kyar kơ hdră hiu čhưn ênguê alŭ wăl.

“Hmei mđing kơ bruă tui duah phung duh bi liê klă sĭt. Srăng mâo klei wĭt lač klă klơ̆ng kơ grăp hdră bruă. Bi phung duh bi liê amâo pŏk ngă bruă hmei srăng mâo hdră msir mghaih djŏ si klei kčah mtrŭn, čiăng mjing klei găl mơ̆ng alŭ wăl dưi ba yua jih klei mâo, dưi mđĭ lar, boh nik mâo dŭm hdră bruă ti dŭm krĭng phŭn”.

Mđrĭng hŏng bruă jak iêu klei duh bi liê, ruh mtlaih klei gun kpăk, mtrŭt mđĭ wưng hluê ngă dŭm hdră hiu čhưn ênguê prŏng, Dak Lak dôk mkŏ dăp anôk bruă hiu čhưn ênguê hlăm wăl anôk mrâo leh hdră mkŏ dăp. Trần Hồng Tiến, Khua knơ̆ng bruă dhar kreh, mjuăt ktang asei mlei lehanăn Hiu čhưn ênguê brei thâo, čar mphŭn mkŏ mkra leh knhuah gru hiu čhưn ênguê hluê Knăm mơak Kphê, Knăm mơak boh durian mguôp hŏng klei găl mnơ̆ng lŏ hma; knăm mơak kan ngừ êa ksĭ, knăm mơak akâo klei êđăp ênang hŏng mnuih trah mă kan mguôp hŏng dhar kreh êa ksĭ. Dak Lak ăt mđĭ kyar lu krĭng ƀuôn sang ngă bruă hiu chưn ênguê êpul êya mguôp hŏng wăl anôk dhar kreh čing čhar Lăn dap kngư.

Wưng ti anăp, Dak Lak srăng mđĭ lar klei găl mâo ti krĭng ktuê hang ksĭ nah Ngŏ lehanăn krĭng dap kngư nah Yŭ kñăm mjing hdră hiu čhưn ênguê djŏ guôp hŏng grăp êpul tuê hiu čhưn.

Hmei bi mklă srăng mjing dŭm klei amâo găl jing klei jăk găl čiăng mđĭ kyar bruă hiu čhưn ênguê. Krĭng nah Yŭ mă dhar kreh čing čhar, kphê jing gru kruăk. Krĭng nah Ngŏ mđĭ kyar bruă hiu čhưn ênguê mdei săn, ba yua wăl anôk dôk hrông msĕ hđăp čiăng jak iêu tuê hiu čhưn. Hmei amâo mđĭ kyar mtŭk mtŭl ôh ƀiădah mâo hdră djŏ guôp hŏng grăp êpul tuê”.

Leh sa wưng pŏk mlar wăl anôk “dliê – ksĭ”, Dak Lak dôk mâo dŭm hdră msir tal êlâo hŏng klei tĭng dlăng dleh kơ hnơ̆ng lehanăn hdră tui ksiêm bruă hiu čhưn ênguê. Lu hdră bruă mdei săn prŏng dưi mtrŭt mđĭ, dŭm klei gun kpăk hlăm hdră duh bi liê dưi mđing ruh mtlaih, bi hgŭm mâo klei bi knăl jăk.

Hdră êlan êran pral Khánh Hòa - Ƀuôn Ama Thuôt dơ̆ng brei găn êrô, dŭm krĭng kplang ksĭ siam mơ̆ng čar bi mklă hdră jak iêu klei duh bi liê… Klei bi kpleh plah wah čư̆ dliê lehanăn êa ksĭ dưi bi hrŏ, sa wăl anôk hiu čhưn ênguê jăk siam lehanăn jiă knhuah dhar kreh mơ̆ng Dak Lak ƀrư̆ dưi mkŏ mjing./.