Kčah klei kñăm đĭ kyar bruă duh mkra 2 ênoh mrô wưng 2026-2030, čar Khánh Hòa dôk mđĭ ktang iêô jak bi liê hlăm dŭm wăl duh mkra, wăl tuh tia mkra mjing čiăng mjing boh kdrŭt đĭ kyar. Knhal jih mlan 5 mrâo êgao, Anôk bruă kriê dlăng Wăl duh mkra leh anăn Wăl tuh tia mkra mjing mđup brei leh hră bi mklă čih anăn bi liê kơ 13 hdră bruă hŏng ênoh prăk giăm 7.500 êklai prăk. Hlăm anăn, hdră bruă Wăl tuh tia mkra mjing Ninh Thọ mâô hnơ̆ng 327ha, ênoh bi liê êbeh 3.800 êklai prăk, mâo čang hmăng pŏk mlar leh lăn tuh tia mkra mjing leh anăn iêô jak thiăm phung duh bi liê tal dua. Bi ala kơ anôk bruă duh mkra mâo ruah ngă pô bi liê hdră bruă, Nguyễn Tuấn Anh, Khua  Knơ̆ng bruă Wăl tuh tia mkra mjing Stavian brei thâô, hră mơar bi liê ară anei mâo msir mgaih pral, mjing  klei hăl kơ anôk bruă duh mkra.

“Dưi lač klei dưi ngă êdah kdlưn leh anăn hmei ăt kăn bi mơh mơh hmeo dưi ngă truh hruê anei pral msĕ snăn. Hlăm wang knŏng mâo 4 mlan ƀiădah bi mklă hră mơar leh anăn jao kơ pô bi liê snăn anăn jing sa hnơ̆ng pral snăk.”

Mbĭt hŏng iêô jak dŭm hdră bruă mrâo, bruă ruh mgaih klei gun kpăk kơ hdră bhiăn čiăng bi kdung bruă ngă kơ dŭm hdră bruă ară anei ăt msĕ mơh đru mkra mđĭ klei đăo knang mơ̆ng êpul êya anôk bruă duh mkra. Lu anôk bruă duh mkra prŏng ti Wăl tuh tia mkra mjing Vân Phong dưi mđĭ wưng ngă bruă mơ̆ng 50 truh 70 thŭn.

Hŏng dŭm hdră bruă nah gŭ wăl tuh tia mkra mjing, wưng bi leh hră mơar bi liê jing klei yuôm bhăn prŏng snăk. Hră mơar ƀrư̆ pral, keh lăn tuh tia mkra mjing ƀrư̆ hnưm dưi ba yua, mjing klei găl iêô jak phung duh bi liê tal dua leh anăn pŏk mlar mkra mjing. Hlue si Anôk bruă kriê dlăng bruă duh mkra leh anăn Wăl tuh tia mkra mjing čar Khánh Hòa, boh tŭ anei dưi mâo mơ̆ng bruă bi mlih hdră gĭt gai, mđĭ klei bi hgŭm plah wah dŭm knơ̆ng, dhar bruă leh anăn đru anôk bruă duh mkra mơ̆ng wưng mprăp hră mơar mtam. Trần Minh Chiến, Khua Anôk bruă kriê dlăng Wăl duh mkra leh anăn Wăl tuh tia mkra mjing čar Khánh Hòa brei thâo:

“Gưl mđup brei hruê 25/5 mrâo êgao mơ̆ng hlăk čih anăn truh kơ tŭ ư hdră êlan knŏng adôk 4 mlan. Jih jang dŭm hdră hmei  khăt bi hrŏ mơ̆ng 30 - 50% hră mơar knŭk kna”.

 Lê Huyền, K’iăng Khua Knơ̆ng bruă sang čư̆ êa čar Khánh Hòa brei thâo, alŭ wăl dôk mđing mđĭ kyar anôk bruă êlan klông nah gŭ mkŏ dŭm wăl tuh tia mkra mjing, wăl duh mkra; mbĭt anăn ruah phung bi liê mâo klei găl kơ ngăn prăk, klei thâo leh anăñ kdrăp mrâo čiăng pŏk ngă hdră bruă phŭn.

“Tĭng kơ Knơ̆ng bruă sang čư̆ êa čar snăn hmei bi mklă leh, ƀiăda gĭr srăng ngă lu hĭn hlăm hdră hrăm mbĭt hŏng dŭm anôk bruă duh mkra. Êngao kơ bruă iêo mthưr phung duh bi liê snăn hmei ăt rơ̆ng klei găl, boh nik dŭm klei găl djŏ tuôm kơ anôk bruă nah gŭ mkŏ hŏng dŭm wăl tuh tia mkra mjing čiăng rơ̆ng kơ phung bi liê tơdah pŏk ngă snăn tal sa jing rơ̆ng klei găl hĭn, tal dua jing mâo klei tŭ dưn hĭn, hlăm anăn mâo klei tŭ đưn mơ̆ng phung duh bi liê, boh tŭ mơ̆ng phung bi liê tal dua leh snăn wăt klei tŭ dưn kơ čar”.

Mơ̆ng bruă bi hrŏ hră mơar tal êlâo truh kơ ruh mgaih klei kpăk đuôm kơ anôk bruă nah gŭ leh anăn anôk ala, Khánh Hòa dôk grăp knhuang mjing klei găl kơ dŭm hdră bruă hnưm pŏk ngă. Anei ăt jing tur knơ̆ng čiăng kơ alŭ wăl lŏ dơ̆ng iêô jak prăk bi liê mrâo, mđing kơ klei kñăm đĭ kyar dua ênoh mrô hlăm wưng kơ anăp./.