Blŭ hrăm ti anôk bi kƀĭn, K’iăng khua knŭk kna Phạm Gia Túc lač, thŭn APEC 2027 mâo phung khua kiă kriê Đảng, lăn čar lehanăn knŭk kna bi mklă jing hdră êlan knơ̆ng kơ klei hlue ngă bruă mjĕ mgiăm hŏng ala tač êngao mơ̆ng klei bi kƀĭn prŏng Đảng 14, kñăm mđĭ hĭn k’hưm, klei dưi pô hŏng ala tač êngao, mjing boh kdrŭt mrâo kơ klei mđĭ kyar duh mkra ala ƀuôn, boh nik hŏng Phú Quốc, tỉnh An Giang lehanăn krĭng dap mnai krông Cửu Long.

Kơ bruă prăp êmiêt klei bi kƀĭn gưl dlông APEC 2027, K’iăng khua knŭk kna mñă anei jing bruă yuôm bhăn, hŏng mta čuăn prŏng jing mkŏ mjing bi tŭ dưn sa thŭn APEC jiă knhuah Việt Nam, đru mguôp jăk kơ klei êđăp ênang, hgŭm mbĭt, lehanăn mđĭ kyar ti alŭ wăl Asi – Pacific lehanăn tar rŏng lăn./.