Truh hruê 30/5, dŭm êpul bruă djŏ tuôm kluôm ala ƀuh leh êbeh 2000 boh klei, msir mgaih êbeh 1.600 klei; ênoh prăk đŭ bi kmhal hŏng prăk êbeh 17,8 êklai prăk, ênoh mnơ̆ng dhơ̆ng ngă soh giăm 115,6 êklai prăk.

Čih yap klei gĭr mơ̆ng dŭm phŭn, dhar bruă leh anăn alŭ wăl, K’iăng Khua knŭk kna Hồ Quốc Dũng brei thâo bruă bi kdơ̆ng, msir mgaih klei ngă soh ăt ka dưi ngă djŏ klei čuăm, hlăk êjai klei hlue ngă hdră kơ klei thâo anak mnuih mơ̆ng lu êpul bruă, mnuih adôk kƀah. K’iăng Khua knŭk kna mtă kơ dŭm phŭn, dhar bruă, alŭ wăl mbha klă mnuih, klă bruă, mđĭ klei tŭ dưn hlue ngă klei dưi ba yua klei thâo leh anăn gĭr mđĭ boh tŭ msir mgaih klei ngă soh ƀiă êdi 20% mkă  hŏng thŭn 2025.