Hruê (23/12), ti Đà Lạt, Knơ̆ng bruă sang čư̆ êa čar Lâm Đồng mkŏ mjing Klei bi kƀĭn ksiêm dlăng Hdră bruă ala čar kơ klei mđĭ bi hgŭm leh anăn mtrŭt mjhar ênoh đru êngao knŭk kna wưng 2019- 2025. Hlăm wưng êgao, čar Lâm Đồng mâo mă 133 hdră bruă, êngao kơ hdră mơ̆ng êpul bruă êngao knŭk kna ala tač êngap đru hŏng ênoh êbeh 18 êklăk 250 êbâo USD. Klei ksiêm dlăng mơ̆ng Knơ̆ng bruă sang čư̆ êa čar Lâm Đồng brei ƀuh, dŭm hdră, hdră bruă mơ̆ng êpul bruă êngao knŭk kna ala tač êngao đru mđĭ kyar bruă duh mkra ala ƀuôn ăt msĕ mơh rơ̆ng klei hdĭp mda ala ƀuôn, lăm lui klei ư̆ êpa, kriê dlăng mdrao mgŭn, mtô bi hriăm, mđĭ klei thâo săng mnuih ƀuôn sang krĭng hdră bruă, boh nik krĭng mnuih djuê ƀiă, krĭng bruă duh mkra dôk dleh dlan.

Čar Lâm Đồng hâo hưn leh klei mđing hlăm bruă iêô jak ênoh đru. Hlue anăn, dŭm bruă mđing mrô sa jing mdrao mgŭn, lŏ hma, sang hră, bruă kơ ala ƀuôn… Čar dôk mkŏ mjing Anăn dŭm hdră bruă iêô mthưr ênoh đru wưng 2026- 2030 hŏng hdră kčah kriê dlăng leh anăn ba yua ênoh đru êngao knŭk kna mơ̆ng ala tač êngao; Mjing klei găl kơ klei bhiăn, hdră êlan čiăng  mtrŭt mjhar dŭm êpul bruă êngao knŭk kna ala tač êngao hlăm bruă ngă, pŏk ngă hdră bruă ti čar mơ̆ng tur knơ̆ng hlue ngă hdră bhiăn Việt Nam leh anăn klei kčah ti alŭ wăl.